ક્રિકેટ મેચ પર સટ્ટો રમવાની આદત પર શરમ વ્યક્ત કરી
અમિતાભ બચ્ચનના ગેમ શો ’કૌન બનેગા કરોડપતિ’ (KBC) ની 18મી સીઝન હાલમાં ખૂબ જ ઉત્સાહથી પ્રસારિત થઈ રહી છે. દરરોજ નવા સ્પર્ધકો શોમાં પોતાનું નસીબ અજમાવવા માટે ’હોટ સીટ’ પર બેસે છે. સોમવારના છત્તીસગઢના દુર્ગના રહેવાસી દુર્ગા પ્રસાદ સાહી હોટ સીટ પર બેઠા હતા. દુર્ગા પ્રસાદ વ્યવસાયે શિક્ષક અને ખેડૂત છે. એપિસોડ દરમિયાન તેમણે ખુલાસો કર્યો કે જુગારની લતને કારણે તેમના પર લાખોનું દેવું હતું અને તેઓ KBC પર જીતેલી ઈનામી રકમનો ઉપયોગ કરીને તે ચૂકવવાનો ઈરાદો ધરાવતા હતા. દુર્ગા પ્રસાદ સાહીએ ₹12.50 લાખ સુધીના પ્રશ્નોના સાચા જવાબ આપ્યા. જોકે ₹25 લાખના પ્રશ્ને તેમને શો છોડવાની ફરજ પાડી.
’કૌન બનેગા કરોડપતિ 18’ એપિસોડ દરમિયાન દુર્ગા પ્રસાદે તેમના અંગત જીવન વિશે વાત કરી. તેમણે શેર કર્યું કે તેમને એક સમયે ક્રિકેટ મેચો પર સટ્ટો રમવાનો આનંદ મળતો હતો. આ રસ ધીમે ધીમે એક આદતમાં પરિણમ્યો, આખરે તે સંપૂર્ણ રીતે જુગારના વ્યસનમાં ફેરવાઈ ગયો. દુર્ગા પ્રસાદે ઉલ્લેખ કર્યો કે તેમણે મિત્રો સાથે ₹10 કે ₹20 ના નાના દાવ લગાવીને શરૂૂઆત કરી હતી. જોકે જ્યારે તેમને તેમના વ્યસનની હદનો ખ્યાલ આવ્યો ત્યારે તેમણે પૈસા ઉધાર લેવાનું શરૂૂ કરી દીધું હતું, દેવું ₹50,000 સુધી પહોંચી ગયું હતું. જેમ જેમ તેમનું દેવું વધતું ગયું તેમણે તેને ચૂકવવા માટે વધુ પૈસા ઉધાર લીધા. જેના કારણે તેમની કુલ જવાબદારી નિયંત્રણ બહાર નીકળી ગઈ. દુર્ગા પ્રસાદે કહ્યું કે તેમને ખ્યાલ પણ ન આવ્યો કે તેમનું ₹10 નું દેવું ક્યારે વધીને ₹10 લાખ થઈ ગયું.
