નેપ્થાની પાઇપલાઇનમાં ચોરીના સ્થળે જ આગ લાગતા રેલ સેવાને અસર
પશ્ચિમ બંગાળના હલ્દિયા પેટ્રોકેમિકલ પ્લાન્ટમાં આજે વહેલી સવારે ભીષણ આગ લાગી. આ ઘટનામાં ઘણા લોકો દાઝી ગયા હોવાના અહેવાલ છે. અહેવાલો અનુસાર, રેલ સેવાઓ પણ ખોરવાઈ ગઈ છે. ઘાયલોને નજીકની હોસ્પિટલમાં દાખલ કરવામાં આવ્યા છે, અને રાહત અને બચાવ કામગીરી ચાલી રહી છે.
હલ્દિયાના ચિરંજીપુર વિસ્તારમાં સ્થિત પેટ્રોકેમિકલ પ્લાન્ટમાં આજે સવારે ભીષણ આગ લાગી. આ ઘટનામાં પંદરેક લોકો દાઝી ગયા છે અને તેમને હોસ્પિટલમાં દાખલ કરવામાં આવ્યા છે. સ્થાનિક સૂત્રો જણાવે છે કે નેપ્થા ગેસ પાઇપલાઇનમાં લીકેજને કારણે સવારે 4:00 વાગ્યાની આસપાસ આગ લાગી હતી. શરૂૂઆતમાં કાળો ધુમાડો જોવા મળ્યો હતો, ત્યારબાદ આગ તીવ્ર બની હતી. કુલ નવ ફાયર ટેન્ડર ઘટનાસ્થળે પહોંચ્યા હતા. દોઢ કલાક પછી પણ આગ પર કાબુ મેળવી શકાયો નથી. ઘાયલોમાં બે મહિલાઓનો સમાવેશ થાય છે, અને તેમની હાલત ગંભીર હોવાનું જાણવા મળે છે.
આગને કારણે ઘણા ઘરો અને દુકાનો બળીને રાખ થઈ ગઈ હતી. હલ્દિયા-પાંસકુરા રેલ સેવાઓ પણ ખોરવાઈ ગઈ છે. રોઇટર્સના અહેવાલ મુજબ પ્લાંટ નજીક એક ગેરકાયદે નેપ્થાચોરીના સ્થળે આગ આગ લાગી હતી. હલ્દિયા પેટ્રોકેમિકલ્સે એક નિવેદનમાં પુષ્ટિ કરી હતી.
નિવેદનમાં એ સ્પષ્ટ કરવામાં આવ્યું નથી કે આગથી રિફાઇનરીના કામકાજ પર કોઈ અસર પડી છે કે નહીં. “અમે અમારા હલ્દિયા સુવિધામાં બનેલી એક ઘટનાથી વાકેફ છીએ, જેમાં કેટલાક લોકોને ઇજાઓ થઈ હોવાના અહેવાલ છે,” નિવેદનમાં જણાવાયું છે. HPL એ જણાવ્યું હતું કે ઘટનાનું ચોક્કસ કારણ તપાસ હેઠળ છે અને કહ્યું હતું કે તેણે સ્થાનિક સમુદાયોને પેટ્રોલિયમ ઉત્પાદનોની અનધિકૃત ઍક્સેસ સામે ચેતવણી આપી છે.
