અમેરિકા-ઇરાન વચ્ચે ભીષણ જંગ, હોર્મુઝ ખાડી- કુવૈત એરસ્પેસ સંપૂર્ણ બંધ

ઇરાનના સિરિક, મિનાલ, કિશદ્વિપ અને બંદર અબ્બાસ શક્તિશાળી બોંબ વિસ્ફોટથી ધણધણી ઉઠયા, ખાડી દેશોમાં અમેરિકાના એરબેઝ પર ઇરાન ત્રાટક્યું

દુનિયાભરમાં ટેન્શન, ક્રૂડ ઓઇલમાં ફરી ભડક્ો, શાંતિમંત્રણાની વાતો વચ્ચે ફરી યુદ્ધ શરૂ થતા શેરબજારો પણ લોહીલોહાણ

મધ્ય પૂર્વમાં તણાવ વધુ તીવ્ર બન્યો છે. અમેરિકા અને ઈરાન વચ્ચેના સંઘર્ષમાં નવા હુમલાઓ અને પ્રતિસાદો સાથે હોર્મુઝ સ્ટ્રેટને ઈરાને સંપૂર્ણ રીતે બંધ કરી દીધો છે. વિશ્વના મહત્વના ઉર્જા માર્ગમાં આ ઘટનાથી વૈશ્વિક તેલના ભાવમાં તીવ્ર વધારો થયો છે. ઇરાનના સિરિક, મિનાલ, કિશદ્વિપ અને બંદર અબ્બાસ પર અમેરીકાએ મિસાઇલો દાગી છે. ઇરાને પણ વળતા હુમલા શરૂ કર્યા છે.

અમેરિકી સેન્ટ્રલ કમાન્ડ (CENTCOM) અનુસાર, રાષ્ટ્રપતિ ડોનાલ્ડ ટ્રમ્પના આદેશથી અમેરિકી દળોએ ઈરાનમાં અનેક લક્ષ્યો પર હુમલા કર્યા છે. આ હુમલાઓમાં સર્વેલન્સ, કોમ્યુનિકેશન અને એર ડિફેન્સ સિસ્ટમ્સને નિશાન બનાવવામાં આવ્યા છે. ડિફેન્સ સેક્રેટરી પીટ હેગ્સેથે જણાવ્યું કે આ કાર્યવાહી ઈરાનની “અનાવશ્યક આક્રમકતા”ના જવાબમાં કરવામાં આવી છે અને તે વાટાઘાટો માટે અમેરિકાની સ્થિતિ મજબૂત કરશે.
ઈરાની મીડિયા અનુસાર, બંદર અબ્બાસ, સિરિક, મિનાબ, કારાજ સહિત અનેક વિસ્તારોમાં વિસ્ફોટોના અહેવાલો મળ્યા છે. ઈરાની વિદેશ મંત્રાલયના પ્રવક્તા એસ્માઈલ બાગાઈએ આ હુમલાઓને “યુદ્ધ અપરાધ” ગણાવ્યા અને કહ્યું કે સિરિકમાં પાણીના રિઝર્વાયરને નુકસાન પહોંચાડવામાં આવ્યું છે, જે 20,000થી વધુ લોકોના પીવાના પાણીને અસર કરશે.

ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC )એ સ્ટ્રેટ ઓફ હોર્મુઝને તમામ વહાણો માટે બંધ જાહેર કર્યો છે. કોઈપણ વહાણ પસાર થવાનો પ્રયાસ કરશે તો તેને નિશાન બનાવવામાં આવશે. IRGC એ બે વહાણો પર ફાયરિંગ કરવાનો દાવો પણ કર્યો છે. અમેરિકી તરફથી આ દાવાઓનો વિરોધ કરવામાં આવ્યો છે અને કહેવામાં આવ્યું છે કે વ્યાપારી જહાજો હજુ પણ આ માર્ગે પસાર થઈ રહ્યા છે.

ઈરાની હુમલાઓના જવાબમાં કુવૈતે પોતાનો હવાઈ માર્ગ બંધ કરી દીધો છે. કુવૈતના સિવિલ એવિએશન અધિકારીઓએ જણાવ્યું કે ફ્લાઈટ્સને અન્ય એરપોર્ટ તરફ વાળવામાં આવી રહી છે. બહેરીનમાં પણ એર રેઈડ સાયરન વાગ્યા છે અને લોકોને આશ્રય લેવાની સલાહ આપવામાં આવી છે. ઈરાને અમેરિકી સૈન્ય ઠેકાણાઓ પર જવાબી હુમલા કર્યા છે.

આ સંઘર્ષ સાથે ઈઝરાયેલ અને હિઝબોલ્લાહ વચ્ચેના તણાવમાં પણ વધારો થયો છે. લેબનોનમાં ઈઝરાયેલી હવાઈ હુમલાઓમાં અનેક લોકોના મોતના અહેવાલો છે. ઈરાને કોઈપણ સમાધાનમાં લેબનોનમાં ઈઝરાયેલી કાર્યવાહી અટકાવવાની માંગ કરી છે.

આ ઘટનાઓથી વૈશ્વિક તેલના ભાવમાં લગભગ 3 ડોલરનો વધારો થયો છે. વિશ્વના લગભગ 20% તેલ અને કુદરતી ગેસ પુરવઠાને આ માર્ગ પર આધારિત છે. કતારી પ્રતિનિધિમંડળ તણાવ ઘટાડવા માટે તેહરાન પહોંચ્યું છે, પરંતુ સ્થિતિ હજુ વધુ વિકટ બની રહી છે.

ઇરાન આક્રમક, 3 દેશોમાં 18 યુએસ સૈન્ય મથકો ઉડાવ્યા
પ્રમુખ ડોનાલ્ડ ટ્રમ્પની કડક ચેતવણી અને અમેરિકન સેના દ્વારા ટોમહોક ક્રૂઝ મિસાઇલોના પ્રહાર બાદ, ઈરાને પણ અમેરિકા સામે આરપારની લડાઈનું એલાન કરીને જોરદાર વળતો પ્રહાર કર્યો છે. ઈરાની ન્યૂઝ એજન્સી ’મેહર’ ના જણાવ્યા અનુસાર, IRGC ની એરોસ્પેસ ફોર્સ અને નેવીએ બે તબક્કામાં મોટું ઓપરેશન પાર પાડ્યું છે. આ હુમલામાં અમેરિકાના અલ-સલેમ એર બેઝ, અહમદ અલ-જાબેર એર બેઝ અને શેખ ઇસા એર બેઝ પર આવેલા અંદાજે 18 જેટલા મહત્વના સૈન્ય ઠેકાણાઓને ધ્વસ્ત કરવાનો દાવો કરાયો છે. આ ઉપરાંત, બહેરીનમાં અમેરિકન સેનાની કમ્યુનિકેશન સિસ્ટમ અને પેટ્રિયોટ એર ડિફેન્સ સિસ્ટમના રડાર લોકેશનને પણ નિશાન બનાવાયા છે, જેના કારણે સમગ્ર બહેરીનમાં એર રેડ સાયરન ગુંજી ઉઠ્યા છે. જોર્ડને પણ પોતાની સરહદમાં આવતી 5 ઈરાની મિસાઈલોને હવામાં જ તોડી પાડી હોવાની પુષ્ટિ કરી છે.

અમેરિકાએ ભારતીય ઓઇલ ટેન્કર ઉડાવ્યું, બે નાગરીકોના મોત, એક લાપતા
મધ્ય પૂર્વમાં વધતા તણાવ વચ્ચે સ્ટ્રેટ ઓફ હોર્મુઝ નજીક અમેરિકી દળો દ્વારા વેપારી તેલ ટેન્કર પર કરવામાં આવેલા હુમલામાં બે ભારતીય માલવાહકોના મોત થયા છે અને એક ચીફ એન્જિનિયર હજુ લાપતા છે. આ ઘટનાથી ભારતીય સમુદ્રી કર્મચારીઓની સલામતી અંગે ચિંતા વધી છે. ફોર્વર્ડ સીમેન્સ યુનિયન ઓફ ઈન્ડિયાના જનરલ સેક્રેટરી મનોજ યાદવે જણાવ્યું કે પલાઉ ફ્લેગવાળા ખઝ સેટેબેલો ટેન્કર પર હુમલો થયો હતો. વહાણમાં 24 ભારતીય ક્રૂ હતા. MEA અનુસાર 21ને બચાવી લેવાયા છે અને ત્રણ લાપતા હતા. હવે બેના મોતની પુષ્ટિ થઈ છે
અને ચીફ એન્જિનિયર હજુ ગુમ છે. ઓમાન અધિકારીઓ સાથે સર્ચ-રેસ્ક્યુ કાર્યવાહી ચાલુ છે. મનોજ યાદવે કહ્યું કે ત્રણ અસરગ્રસ્ત કર્મચારીઓ હિમાચલ પ્રદેશ, દેઓરિયા (ઉત્તર પ્રદેશ) અને આંધ્ર પ્રદેશના છે. વહાણ સાથે સંપર્ક વિક્ષેપિત થયો છે, જેના કારણે વિગતોની સ્વતંત્ર પુષ્ટિ મુશ્કેલ બની છે. વિદેશ મંત્રાલયે હુમલાની નિંદા કરી છે અને ઓમાનમાં ભારતીય એમ્બેસીએ સ્થિતિનું સતત મોનિટરિંગ કરી રહી છે. MEA એ અમેરિકાના ચાર્જ ડી એફેર્સ જેસન મીક્સને વિરોધ પત્ર સોંપ્યો છે. અધિક સેક્રેટરી નાગરાજ નાયડુએ આ મુદ્દે વાત કરી હતી. સરકારે વિસ્તારમાં તણાવ ઘટાડવા અને વાટાઘાટો દ્વારા સમાધાનની અપીલ કરી છે. FSUI એ પણ પ્રશ્ન ઉઠાવ્યો છે કે અમેરિકી દળોને વહાણ પર ભારતીયો હોવાની જાણ હોવા છતાં કેમ આવી કાર્યવાહી કરવામાં આવી. તેઓ કહે છે કે વહાણને અટકાવવાના અન્ય વિકલ્પો હતા.