મોડું પણ ગાજતું આવ્યું…કેરળમાં ચોમાસાનું ધમાકેદાર આગમન

પહેલી આગાહીથી 10 દિવસ બાદ મેઘરાજાની શાહી સવારી આવી પહોંચી, પાંચ દિવસ દક્ષિણ ભારતમાં ભારેથી અતિભારે વરસાદની આગાહી

કાળઝાળ ગરમી, શેકાતી સડકો અને અસહ્ય ઉકળાટ વચ્ચે આખરે આખા દેશ માટે સૌથી મોટા ખુશખબર આવી ગયા છે. દક્ષિણ-પશ્ચિમ ચોમાસાએ કેરળમાં સત્તાવાર રીતે દસ્તક આપી દીધી છે. આ સાથે જ ભારતમાં વરસાદની મુખ્ય સીઝનનો પ્રારંભ થઈ ચૂક્યો છે.

ભારતીય હવામાન વિભાગની સત્તાવાર જાહેરાત બાદ કેરળના અનેક વિસ્તારોમાં તેજ વરસાદ શરૂૂ થઈ ગયો છે અને આકાશમાં ઘેરાયેલા કાળાડિબાંગ વાદળોએ ગરમીની તીવ્રતાને શાંત કરી દીધી છે. દર વર્ષની જેમ આ વર્ષે પણ ચોમાસાનું આગમન માત્ર હવામાનની અપડેટ નથી, પરંતુ દેશના કરોડો ખેડૂતો, વેપારીઓ અને સામાન્ય જનતા માટે આશા અને રાહતનો મોટો સંદેશ લઈને આવ્યું છે. ખેતરોથી લઈને શહેરો સુધી હવે સૌ કોઈની નજર વરસાદની આગામી ગતિ પર ટકેલી છે. અગાઉ હવામાન વિભાગ દ્વારા 26મેના ચોમાસુ પ્રવશસે તેવી આગાહી કરાઇ હતી પણ બાદમાં 4 જૂનની તારીખ આપવામાં આવી હતી.

હવામાન વિભાગે ગુરુવારે પુષ્ટિ કરી છે કે ચોમાસું કેરળમાં પ્રવેશી ચૂક્યું છે અને તેની સાથે જ લક્ષદ્વીપ તથા દરિયાકાંઠાના વિસ્તારોમાં વરસાદી ગતિવિધિઓ તેજ બની છે. IMD દ્વારા 4 જૂનથી 9 જૂન વચ્ચે કેરળમાં ભારેથી અતિભારે વરસાદની ચેતવણી (ઓરેન્જ એલર્ટ) જાહેર કરવામાં આવી છે. આ સમયગાળા દરમિયાન અનેક વિસ્તારોમાં 7 સેન્ટિમીટરથી લઈને 20 સેન્ટિમીટર સુધીનો ખાબકી શકે છે. ખાસ કરીને તિરુવનંતપુરમ, કોલ્લમ, પથાનમથિટ્ટા, અલપ્પુઝા, કોટ્ટાયમ, ઇડુક્કી, એર્નાકુલમ અને ત્રિશૂર જિલ્લામાં વહીવટીતંત્રને એલર્ટ પર રાખવામાં આવ્યું છે. ભારે વરસાદના કારણે નીચાણવાળા વિસ્તારોમાં પાણી ભરાવાની અને જનજીવન પ્રભાવિત થવાની શક્યતા પણ દર્શાવવામાં આવી છે.

ભારતીય અર્થતંત્ર અને કૃષિ ક્ષેત્ર મોટેભાગે ચોમાસાના વરસાદ પર નિર્ભર છે. દેશમાં ચોમાસાની આ ધમાકેદાર શરૂૂઆતથી ખરીફ પાકની વાવણી કરતા ખેડૂતોમાં ખુશીનો માહોલ જોવા મળી રહ્યો છે. જો ચોમાસું આવી જ પ્રગતિ સાથે આગળ વધશે, તો દેશમાં અનાજનું ઉત્પાદન વધશે અને મોંઘવારી પર પણ લગામ કસવામાં મદદ મળશે. હવામાન વિભાગે લોકોને હવે છત્રી અને રેઇનકોટ તૈયાર રાખવાની સલાહ આપી છે.

15 દિવસમાં ગુજરાત-બિહાર સુધી પહોંચી જશે

ચોમાસાની કેરળમાં એન્ટ્રી બાદ હવે તે ઝડપથી આગળ વધશે. હવામાન વૈજ્ઞાનિકોના જણાવ્યા અનુસાર, આગામી દિવસોમાં ચોમાસું દેશના અન્ય ભાગોને પણ આવરી લેશે. ઉત્તર ભારત, મધ્ય ભારત અને દક્ષિણ ભારતના અનેક રાજ્યોમાં આગામી દિવસોમાં તેજ પવન અને ગાજવીજ સાથે વરસાદ થવાનું એલર્ટ જાહેર કરાયું છે. કેરળમાં સામાન્ય રીતે 1 જૂનની આસપાસ ચોમાસું બેસતું હોય છે, પરંતુ આ વખતે 4 જૂને તેની સત્તાવાર શરૂૂઆત થઈ છે. આ ગતિ જોતાં આગામી થોડા દિવસોમાં ચોમાસું મહારાષ્ટ્ર થઈને જૂનના મધ્ય સુધીમાં બિહાર અને જૂનના અંતિમ અઠવાડિયા સુધીમાં ઉત્તર પ્રદેશ (ઞઙ)માં પ્રવેશ કરે તેવી પૂરેપૂરી સંભાવના છે.