હજારો વિદ્યાર્થીઓનું બજેટ ખોરવાયું, 10 ટકાનો ભાવ વધારો લાદતા છાત્રાલય સંચાલકો
ઇરાન અને અમેરિકા વચ્ચે યુધ્ધની વિપરીત અસરો વ્યાપક સ્વરૂપ ધારણ કરી રહી છે અને રસોડાથી ઉદ્યોગો સુધી મોંઘવારીની આગ લાગી છે ત્યારે ગેસના ભાવ વધારાના કારણે પીજીના ભાડામાં તોતીંગ વધારો થતાં પીજીમાં રહેતા હજારો વિદ્યાર્થીઓના બજેટ ખોરવાયા છે.
કોમર્શિયલ રાંધણ ગેસના ભાવમાં થયેલા અસહ્ય વધારાની સીધી અસર હવે સામાન્ય જનતા અને વિદ્યાર્થીઓના ખિસ્સા પર દેખાવા લાગી છે.હોસ્ટેલ અને પીજી સંચાલકોએ ભાડામાં 10% વધારો કરવાની જાહેરાત કરી છે, જેની અસર રાજ્યના અંદાજે 20 લાખ લોકો પર પડશે. આ ભાવવધારા પાછળનું પ્રાથમિક કારણ 19 કિલોગ્રામના કોમર્શિયલ એલપીજી સિલિન્ડરની કિંમતમાં થયેલો તોતિંગ વધારો છે. રાજ્યમાં કોમર્શિયલ ગેસના ભાવમાં ₹993નો જંગી વધારો થતા, હવે એક સિલિન્ડરની કિંમત ₹3,237 પર પહોંચી ગઈ છે. હોસ્ટેલના રસોડામાં ગેસનો વપરાશ મોટા પાયે થતો હોવાથી સંચાલકો માટે જૂના ભાવે સુવિધા આપવી આર્થિક રીતે અશક્ય બની હતી.રાજ્ય સ્તરીય હોસ્ટેલ એસોસિએશનના જણાવ્યા અનુસાર, નવા ભાડા દરો પાંચ મેથી અમલમાં આવી ગયા છે. નોન-એસી રૂૂમ માટે અંદાજિત નવા ભાવો નીચે મુજબ નક્કી કરવામાં આવ્યા જેમાં ચાર વ્યકિત માટેનો રૂમ 6500થી 7500, ત્રણ વ્યકિત માટેનો રૂમ 7 હજારથી 8 હજાર અને બે વ્યકિત માટેના રૂમનો ભાવ 8 હજારથી 9 હજાર સુધી નકકી કરાયો છે.
ખર્ચને પહોંચી વળવા માટે કેટલીક હોસ્ટેલોએ લાકડા જેવા વૈકલ્પિક બળતણનો ઉપયોગ કરવાનો પ્રયાસ કર્યો હતો, પરંતુ તેના ભાવમાં પણ વધારો થતા સંચાલકો પાસે ભાડું વધારવા સિવાય અન્ય કોઈ વિકલ્પ બચ્યો નથી. ઘણા સ્થળોએ ગેસની અછતને કારણે સંચાલકોએ બહારથી ઊંચા ભાવે સિલિન્ડર ખરીદવા પડ્યા હોવાનું પણ સામે આવ્યું છે. જો ગેસ અને અન્ય મેન્ટેનન્સ ખર્ચમાં ઘટાડો નહીં થાય, તો આગામી સમયમાં છાત્રાલયોમાં રહેવું હજુ પણ મોંઘું બની શકે છે. આ આર્થિક ફેરફાર મધ્યમ વર્ગ અને વિદ્યાર્થીઓ માટે એક મોટો પડકાર બની રહ્યો છે.
માસિક 500થી 1000નો વધારો
હોસ્ટેલ અને પીજીમાં રહેતા વિદ્યાર્થીઓ અને નોકરિયાત વર્ગને હવે મોંઘવારીનો માર સહન કરવો પડશે. ખાસ કરીને ચેન્નાઈ જેવા મોટા શહેરોમાં રહેતા લોકોના માસિક બજેટમાં આશરે ₹500 થી ₹1,000નો વધારો થશે. વધતા ખર્ચને કારણે ઘણી હોસ્ટેલોએ તેમના મેનૂમાં ફેરફાર કર્યો છે અથવા વધુ ઇંધણ માંગતી વાનગીઓ બનાવવાનું ઓછું કરી દીધું છે. પરિણામે, રહેવાસીઓએ હવે ભોજન માટે બહારના વિક્રેતાઓ કે પેકેજ્ડ ફૂડ પર નિર્ભર રહેવું પડી રહ્યું છે, જે તેમના જીવનનિર્વાહના ખર્ચમાં વધુ વધારો કરે છે.
