સશસ્ત્ર જૂથે અનેક ઘરો ફૂંકી માર્યા : ઠેર-ઠેર આગજની
મણિપુરના ઉખરુલ જિલ્લામાં શુક્રવારની સવાર ગોળીબારના ગડગડાટથી ફાટી પડી હતી. હરીફ આદિવાસી સમુદાયોના સશસ્ત્ર જૂથો વચ્ચે થયેલી બે અલગ-અલગ હિંસક ઘટનાઓમાં ત્રણ લોકોના ઘટનાસ્થળે જ મોત નીપજ્યા છે. આ હિંસા બાદ સમગ્ર વિસ્તારમાં ભારેલા અગ્નિ જેવી સ્થિતિ સર્જાઈ છે અને સુરક્ષા દળોએ ઉચ્ચ સ્તરીય સતર્કતા જાહેર કરી દીધી છે.
વહેલી સવારે 5.30 વાગ્યે ઉખરુલના મુલ્લામ ગામમાં સશસ્ત્ર જૂથો વચ્ચે આમને-સામને ભારે ગોળીબાર શરૂૂ થયો હતો. આતંકવાદીઓએ માત્ર ગોળીબાર જ નહીં, પરંતુ ગામના બહારના વિસ્તારોમાં આવેલા અનેક ઘરોને પણ આગ ચાંપી દીધી હતી. સુરક્ષા દળો જ્યારે સવારે 11.25 વાગ્યે ઘટનાસ્થળે પહોંચ્યા ત્યારે તેમને એલ. સિતલહો અને પી. હાઓલાઈ નામના બે વ્યક્તિઓના મૃતદેહ મળી આવ્યા હતા, જેઓ છદ્માવરણના પોશાકમાં હતા અને તેમને ગોળી વાગી હતી.
ઉખરુલના જ સિનાકેઇથેઈ ગામ નજીક બનેલી અન્ય એક ઘટનામાં 29 વર્ષીય એચ. જામંગ નામના યુવકની નિર્મમ હત્યા કરવામાં આવી છે. મળતી માહિતી મુજબ, જ્યારે નાગા ગ્રામ રક્ષકો પેટ્રોલિંગ માટે નીકળ્યા હતા ત્યારે કુકી આતંકવાદીઓ દ્વારા તેમના પર અચાનક હુમલો કરવામાં આવ્યો હતો. તાંગખુલ નાગા લોંગ નામના સંગઠને આ ઘટના અંગે ઘેરા દુ:ખની સાથે આક્રોશ વ્યક્ત કર્યો છે. 18 એપ્રિલના રોજ બે નાગા નાગરિકોની હત્યા બાદ આ તણાવ સતત વધી રહ્યો છે. હાલમાં ઉખરુલ અને પડોશી કામજોંગ જિલ્લામાં સ્થિતિ અત્યંત નાજુક છે. સુરક્ષા એજન્સીઓ દ્વારા વધારાની કુમક બોલાવવામાં આવી છે અને આતંકવાદીઓને પકડવા માટે ગાઢ જંગલો અને ગામડાઓમાં સર્ચ ઓપરેશન હાથ ધરવામાં આવ્યું છે.
