હૈદરાબાદની આયાત-નિકાસ પેઢીમા દરોડા દરમિયાન ચોંકાવનારી ઘટના
તેલંગાણા હૈદરાબાદમાં માનવ રક્ત કોથળીઓમાં પેક કરાયેલ 1000 લિટર બકરી અને ઘેટાંનું લોહી મળી આવ્યું.અધિકારીઓએ હૈદરાબાદ પોલીસ અને ડ્રગ કંટ્રોલ અધિકારીઓ સાથે મળીને એક ગુપ્ત માહિતીના આધારે આ દરોડો પાડ્યો હતો. માનવ ઉપયોગ માટે બનાવાયેલી રક્ત કોથળીઓમાં પ્રાણીઓનું લોહી મળી આવતા અધિકારીઓ ચોંકી ગયા.
તેલંગાણાના હૈદરાબાદના કાચીગુડા વિસ્તારમાં એક આયાત-નિકાસ પેઢી પર દરોડા દરમિયાન, અધિકારીઓને કંઈક એવું મળ્યું જે તેમને આશ્ચર્યચકિત કરી ગયું. માહિતી અનુસાર, ડ્રગ કંટ્રોલ એડમિનિસ્ટ્રેશન (DCA) ના દરોડા દરમિયાન અધિકારીઓને આશરે 1,000 લિટર પ્રાણીઓનું લોહી મળી આવ્યું. આ લોહી બકરા અને ઘેટાંમાંથી ગેરકાયદેસર રીતે એકત્રિત કરવામાં આવ્યું હતું અને માનવ રક્ત માટે બનાવાયેલ લોહીની થેલીઓમાં પેક કરવામાં આવ્યું હતું.
બકરીના લોહી ઉપરાંત, લોહીના પેકેજિંગ માટે ઉપયોગમાં લેવાતા કેટલાક અત્યાધુનિક મશીનો પણ પરિસરમાં મળી આવ્યા હતા. દરોડા પાડતી ટીમને એક ઓટોક્લેવ મશીન, લેમિનાર એર ફ્લો યુનિટ, 110 ભરેલી લોહીની થેલીઓ અને આશરે 60 ખાલી રક્તની થેલીઓ પણ મળી આવી હતી. ડ્રગ કંટ્રોલ અધિકારીઓના જણાવ્યા અનુસાર, આનો ઉપયોગ ગેરકાયદેસર ક્લિનિકલ ટ્રાયલ, પ્રયોગો અથવા લેબ પરીક્ષણો માટે કલ્ચર મીડિયા તૈયાર કરવા માટે થઈ શકે છે. કંપનીનો માલિક હાલમાં ફરાર છે.
