ભારત સરકારે ભારતમાં રહેતા પાકિસ્તાની નાગરિકોને મોટી રાહત આપી છે. કેન્દ્ર સરકારે આવા લોકોને વાઘા-અટારી બોર્ડર દ્વારા આગામી આદેશ સુધી પાછા ફરવાની મંજૂરી આપી છે. ગૃહ મંત્રાલયના આ આદેશમાં, અગાઉના સૂચનોમાં સુધારો કરવામાં આવ્યો છે. તેમાં 30 એપ્રિલ સુધીની સમયમર્યાદા નક્કી કરવામાં આવી હતી. તાજેતરના આદેશમાં કહેવામાં આવ્યું છે કે, આ આદેશની સમીક્ષા કરવામાં આવી છે અને આંશિક સુધારા સાથે હવે આદેશ આપવામાં આવે છે કે પાકિસ્તાની નાગરિકોને આગામી આદેશો સુધી યોગ્ય મંજૂરી સાથે અટારી ખાતે સંકલિત ચેક પોસ્ટ દ્વારા ભારતથી પાકિસ્તાન મુસાફરી કરવાની મંજૂરી આપી શકાય છે.
કેન્દ્રના નિર્દેશ પછી છ દિવસમાં 55 રાજદ્વારીઓ અને તેમના સહાયક સ્ટાફ સહિત 786 જેટલા પાકિસ્તાની નાગરિકો અટારી-વાઘા સરહદ દ્વારા ભારત છોડી ગયા છે. પાકિસ્તાનથી 1,465 ભારતીયો ભારત આવ્યા છે. પહેલગામ આતંકવાદી હુમલા બાદ દેશ છોડવાનો આદેશ આપવામાં આવ્યો હતો, જેમાં આતંકવાદીઓ દ્વારા 25 પ્રવાસીઓ અને એક કાશ્મીરી સ્થાનિક વ્યક્તિની ગોળી મારીને હત્યા કરવામાં આવી હતી.
સરકારે ટૂંકા ગાળાના અને સાર્ક વિઝા ધરાવતા લોકોને 27 એપ્રિલ સુધીમાં ભારત છોડવાનો નિર્દેશ આપ્યો હતો. તેવી જ રીતે, મેડિકલ વિઝા ધરાવતા લોકો માટે અંતિમ તારીખ 29 એપ્રિલ હતી. ગયા અઠવાડિયે, કેન્દ્રીય ગૃહમંત્રી અમિત શાહે તમામ રાજ્યોના મુખ્યમંત્રીઓને ફોન કરીને ખાતરી કરવા જણાવ્યું હતું કે કોઈ પાકિસ્તાની નિર્ધારિત સમય મર્યાદાથી વધુ ભારતમાં ન રહે.
22 એપ્રિલના રોજ આતંકવાદીઓએ જમ્મુ અને કાશ્મીરના પહેલગામ પર હુમલો કર્યો અને 26 નિર્દોષ પ્રવાસીઓની નિર્દયતાથી હત્યા કરી. આ ખીણમાં પ્રવાસીઓ પર થયેલા સૌથી મોટા હુમલાઓમાંનો એક હતો. આ હુમલા બાદથી ભારત-પાકિસ્તાન સંબંધોમાં તણાવ છે. ભારતે પાકિસ્તાન સાથેની સિંધુ જળ સંધિ પણ રદ કરી દીધી છે.
—-
