સુરેન્દ્રનગર જિલ્લામાં ’બાળ સુરક્ષા અને POCSO અમલીકરણ’ અભિયાન અંતર્ગત જોરાવરનગર પોલીસે એક કિશોરીને તેના પરિવાર સાથે પુન:મિલન કરાવ્યું છે. આ કામગીરી SHE ટીમ અને ચાઇલ્ડ વેલ્ફેર કમિટી (CWC)ની મદદથી પાર પાડવામાં આવી હતી.
ગત 7 ફેબ્રુઆરી, 2026ના રોજ પેટ્રોલિંગ દરમિયાન રતનપર રામજી મંદિર નજીક એક કિશોરી એકાંતમાં ઊભેલી મળી આવી હતી. પોલીસે તેની સાથે વાતચીત કરતાં જાણવા મળ્યું કે રાજકોટમાં રહેતી આ કિશોરીને તેની માતાએ અભ્યાસ બાબતે ઠપકો આપ્યો હતો. જેના કારણે તે ઘરેથી નીકળી બસમાં બેસી સુરેન્દ્રનગર આવી પહોંચી હતી.
સુરક્ષાના કારણોસર, પોલીસ ટીમે તાત્કાલિક કિશોરીને પોલીસ સ્ટેશન લાવી તેના માતા-પિતાનો સંપર્ક કર્યો. પરિવારના સભ્યો પોલીસ સ્ટેશન આવતા, પોલીસે કિશોરી અને વાલીઓ વચ્ચે સમજાવટ કરી સુખદ સમાધાન કરાવ્યું હતું.
અંતે, કિશોરીને સુરક્ષિત રીતે તેના પરિવારને સોંપવામાં આવી હતી. આ કામગીરીમાં ઇન્ચાર્જ પોલીસ ઇન્સ્પેક્ટર એમ.આર. ગોહિલ, મહિલા હેડ કોન્સ્ટેબલ સોનલબેન અને મહિલા કોન્સ્ટેબલ મિતલબેન સહિતના સ્ટાફે ભાગ લીધો હતો.