રાજકોટ સહિત સમગ્ર સૌરાષ્ટ્ર માટે હવાઈ પરિવહન ક્ષેત્રે મહત્વપૂર્ણ સમાચાર સામે આવ્યા છે. કેન્દ્ર સરકારના ગૃહ મંત્રાલય દ્વારા રાજકોટના હિરાસર એરપોર્ટને ઇમિગ્રેશન એરપોર્ટની કેટેગરી-1ની યાદીમાં સામેલ કરવામાં આવ્યું છે એટલે કે ફોરેન ઇમિગ્રેશન માટે મંજૂરી આપવામાં આવી છે. આ સાથે ગુજરાતના વડોદરા એરપોર્ટનો પણ આ યાદીમાં સમાવેશ કરાયો. આ અંગે કેન્દ્રીય ગૃહ મંત્રાલયે ભારતના રાજપત્ર (ગેઝેટ ઓફ ઇન્ડિયા)માં સત્તાવાર અધિસૂચના પ્રસિદ્ધ કરી હતી.
ભારત સરકારના ગૃહ મંત્રાલય દ્વારા ઇમિગ્રેશન અને વિદેશી નાગરિકો વિષયક અધિનિયમ, 2025ની કલમ-4ની પેટાકલમ (1) હેઠળ મળેલી સત્તાનો ઉપયોગ કરી અગાઉ જાહેર કરવામાં આવેલી એરપોર્ટની યાદીમાં સુધારો કરવામાં આવ્યો. આ સુધારા અંતર્ગત કેટેગરી-1ના એરપોર્ટની યાદીમાં ક્રમ નંબર 40 પર રાજકોટ હિરાસર (ગુજરાત) અને ક્રમ નંબર 41 પર વડોદરા (ગુજરાત)નો સમાવેશ કરવામાં આવ્યો.
કેન્દ્રીય ગૃહ મંત્રાલય દ્વારા આ અધિસૂચના જાહેર કરવામાં આવી હતી. નોટિફિકેશન પર ગૃહ મંત્રાલયના અધિક અગ્રસચિવ નિતેશ કુમાર વ્યાસની સહી સાથે તેને સત્તાવાર માન્યતા આપવામાં આવી. અગાઉ 1 સપ્ટેમ્બર, 2025ના રોજ જાહેર કરાયેલી મૂળ અધિસૂચનામાં સમયાંતરે સુધારા કરવામાં આવ્યા હતા. હવે આ નવા સુધારા દ્વારા ગુજરાતના બે એરપોર્ટનો કેટેગરી-1ની યાદીમાં સમાવેશ કરવામાં આવ્યો.
હિરાસર એરપોર્ટને આ યાદીમાં સ્થાન મળવું એ રાજકોટ અને સમગ્ર સૌરાષ્ટ્રના હવાઈ પરિવહન ક્ષેત્ર માટે મહત્વપૂર્ણ વિકાસ તરીકે જોવામાં આવી રહ્યું છે. સૌરાષ્ટ્રનું મુખ્ય વેપારી, ઔદ્યોગિક અને શૈક્ષણિક કેન્દ્ર હોવાથી અહીંથી દેશ-વિદેશમાં અવરજવર કરતા મુસાફરોની સંખ્યા અને જરૂૂરિયાતો પણ મહત્વપૂર્ણ છે. ખાસ ઉદ્યોગકારો, વેપારીઓ, પ્રવાસીઓ અને વિદેશ સાથે વ્યવસાયિક સંબંધ ધરાવતા લોકો માટે ભવિષ્યમાં હવાઈ સેવાઓના વિસ્તરણની નવી સંભાવના ઊભી થઈ શકે છે.
હિરાસર એરપોર્ટને કેટેગરી-1ની યાદીમાં સામેલ કરવાના નિર્ણયથી ભવિષ્યમાં ઇમિગ્રેશન સંબંધિત સુવિધાઓ અને આંતરરાષ્ટ્રીય હવાઈ જોડાણના વિકાસ માટે માર્ગ મોકળો થવાની અપેક્ષા છે. જોકે, આ અધિસૂચના દ્વારા એરપોર્ટનો યાદીમાં સમાવેશ કરવામાં આવ્યો છે, આંતરરાષ્ટ્રીય ફ્લાઇટ શરૂૂ થવાની તારીખ કે સીધી ફ્લાઇટ સેવા શરૂૂ થવાની જાહેરાત કરવામાં આવી નથી. એ સાથે હિરાસર અને વડોદરા એરપોર્ટનો સમાવેશ ગુજરાત માટે મહત્વપૂર્ણ છે. કેન્દ્ર સરકારના આ નિર્ણયથી રાજ્યના હવાઈ પરિવહન ક્ષેત્રે વિકાસની નવી શક્યતા ઊભી થવાની સાથે રાજકોટને આંતરરાષ્ટ્રીય સ્તરે વધુ સારી હવાઈ કનેક્ટિવિટી મળે તેવી અપેક્ષાઓને પણ વેગ મળ્યો છે.