અમૃતસર એરપોર્ટ નજીક ડ્રોન ગતિવિધિના અહેવાલો બાદ ત્રણ ફ્લાઇટ્સ ડાયવર્ટ કરવામાં આવી હતી. અહેવાલો અનુસાર રવિવારે રાત્રે 9 વાગ્યાની આસપાસ રાજાસાંસી નજીકના એક ગામમાં ડ્રોન ગતિવિધિ જોવા મળી હતી, જેના કારણે સાવચેતીના પગલા તરીકે ફ્લાઇટ્સ ડાયવર્ટ કરવામાં આવી હતી. એરપોર્ટ પર સુરક્ષા વધારી દેવામાં આવી છે, જોકે ડ્રોન ગતિવિધિની કોઈ સત્તાવાર પુષ્ટિ થઈ નથી.
ડ્રોન પ્રવૃત્તિના અહેવાલો બાદ દિલ્હીથી અમૃતસર જઈ રહેલી એર ઈન્ડિયાની ફ્લાઈટ AI-855ને દિલ્હી પાછી વાળવામાં આવી હતી. દરમિયાન, મુંબઈથી અમૃતસર જતી ઈન્ડિગોની ફ્લાઈટ 6E-5028ને ચંદીગઢ તરફ વાળવામાં આવી હતી. આ ઉપરાંત, કુઆલાલંપુરથી અમૃતસર આવી રહેલી મલેશિયા એરલાઈન્સની ફ્લાઈટ MH-118ને દિલ્હી તરફ વાળવામાં આવી હતી. આ ઘટના બાદ એરપોર્ટ પર સુરક્ષા વ્યવસ્થા સઘન બનાવવામાં આવી છે.
રવિવારે, દિલ્હીથી ચેન્નાઈ જતી ઈન્ડિગોની એક ફ્લાઈટે પણ ઈમરજન્સી લેન્ડિંગ કર્યું હતું. ફ્લાઈટ દરમિયાન એક મુસાફરના ઈલેક્ટ્રોનિક ઉપકરણમાંથી ધુમાડો નીકળવા લાગ્યો હતો, જેના કારણે વિમાનને હૈદરાબાદ તરફ વાળવામાં આવ્યું હતું. વિમાન રાજીવ ગાંધી ઈન્ટરનેશનલ એરપોર્ટ પર સુરક્ષિત રીતે ઉતર્યું હતું. ત્યારબાદ મુસાફરોને ચેન્નાઈ પહોંચાડવા માટે વૈકલ્પિક વિમાનની વ્યવસ્થા કરવામાં આવી હતી.
આ ઘટના 11 ઓક્ટોબરે ઈન્ડિગોની ફ્લાઈટ 6E 6115માં બની હતી. એરલાઈનના જણાવ્યા અનુસાર, ધુમાડો જોવા મળતા કેબિન ક્રૂએ તાત્કાલિક પગલાં લીધાં અને પરિસ્થિતિને કાબૂમાં લીધી. ત્યારબાદ સુરક્ષાના કારણોસર ફ્લાઈટને હૈદરાબાદ તરફ વાળવાનો નિર્ણય લેવામાં આવ્યો હતો. એરલાઈને મુસાફરોને થયેલી અસુવિધા બદલ ખેદ વ્યક્ત કર્યો છે.
