નાગાલેન્ડની પૃષ્ઠભૂમિ પર આધારિત ભારતીય ફિલ્મ ‘અંગ’ (અક્ષલવ)ને ટોરોન્ટો ઇન્ટરનેશનલ ફિલ્મ ફેસ્ટિવલમાં નોંધપાત્ર સફળતા અને પ્રશંસા મળી છે. નાગાલેન્ડના ફિલ્મ નિર્માતા તેજા રિયો દ્વારા નિર્દેશિત આ ફિલ્મે પ્રતિષ્ઠિત ’પ્લેટફોર્મ પ્રાઇઝ’ જીત્યું છે. આ સિદ્ધિ ખાસ કરીને મહત્વપૂર્ણ છે કારણ કે આ પુરસ્કાર ફિલ્મને 2027ના ઓસ્કારમાં ’બેસ્ટ ઇન્ટરનેશનલ ફીચર ફિલ્મ’ શ્રેણીમાં સીધો પ્રવેશ અપાવે છે. TIFFની જ્યુરીએ ‘અંગ’ને તેના તાજગીભર્યા દ્રષ્ટિકોણ, અદભૂત સિનેમેટોગ્રાફી અને ઊંડાણ તથા સુંદરતા સાથે એક અનોખી દુનિયાને પડદા પર રજૂ કરવાની ક્ષમતા માટે ’પ્લેટફોર્મ પ્રાઇઝ’ એનાયત કર્યું.
જ્યુરીએ દિગ્દર્શક તેજા રિયોની દ્રષ્ટિ અને સાહસની પણ પ્રશંસા કરી. આ વર્ષથી, TIFFનું ’પ્લેટફોર્મ પ્રાઇઝ’ એવા પસંદગીના ફિલ્મ ફેસ્ટિવલ પુરસ્કારોના જૂથમાં સામેલ થયું છે જે વિજેતા ફિલ્મોને ઓસ્કારની ’ઇન્ટરનેશનલ ફીચર ફિલ્મ’ શ્રેણીમાં સીધો પ્રવેશ આપે છે. 1960ના દાયકાના નાગાલેન્ડ પર આધારિત, ‘અંગ’ એક પિતા અને તેમના પુત્રની વાર્તા કહે છે. આ વાર્તા એક મિશનરીના આગમન પછી આગળ વધે છે અને દર્શાવે છે કે કેવી રીતે પુત્ર મિશનરીની જીવનશૈલી અને રીતભાતથી પ્રભાવિત થાય છે.
