સ્વતંત્રતા દિવસ (૧૫ ઓગસ્ટ)ની ઉજવણી પહેલા સંભવિત આતંકવાદી ખતરાને ધ્યાનમાં રાખીને દિલ્હી પોલીસે સમગ્ર રાજધાનીમાં હાઇ એલર્ટ જાહેર કર્યું છે. સાવચેતીના પગલા તરીકે પોલીસે શહેરના મુખ્ય સ્થળો, જાહેર સ્થળો અને વ્યસ્ત બજારોમાં ૧૯ મોસ્ટ-વોન્ટેડ આતંકવાદીઓના પોસ્ટર લગાવ્યા છે.
દિલ્હી પોલીસે જારી કરેલા આ પોસ્ટરોમાં ઇન્ડિયન મુજાહિદ્દીન, અલ-કાયદા અને વિવિધ ખાલિસ્તાની આતંકવાદી સંગઠનો સાથે જોડાયેલા ખતરનાક શંકાસ્પદોના ફોટોગ્રાફ્સ અને વિગતો દર્શાવવામાં આવી છે. પોસ્ટરોમાં ઇન્ડિયન મુજાહિદ્દીનના રિયાઝ ભટકલ અને શબંદરી મોહમ્મદ ઇકબાલ (ઉર્ફે ઇકબાલ ભટકલ), તેમજ અલ-કાયદા સાથે જોડાયેલા મોહમ્મદ શરજીલ અખ્તર, અબુ સુફિયાન અને સૈયદ મોહમ્મદ અરશિયાન જેવા વ્યક્તિઓ દર્શાવવામાં આવ્યા છે.
મોસ્ટ-વોન્ટેડ આતંકવાદીઓની યાદીમાં મુખ્ય નામોમાં ‘ખાલિસ્તાન ઝિંદાબાદ ફોર્સ’ના રણજીત સિંહ (ઉર્ફે નીતા) અને પરમજીત સિંહ પમ્મા; ‘ખાલિસ્તાન ટાઇગર ફોર્સ’ના અર્શદીપ સિંહ (ઉર્ફે અર્શ ડલ્લા); અને ‘બબ્બર ખાલસા ઇન્ટરનેશનલ’ (BKI) ના હરવિંદર સિંહ સંધુ (ઉર્ફે રિંડા), વાધવા સિંહ બબ્બર અને ગુરમીત સિંહ બગ્ગાનો સમાવેશ થાય છે.
એ નોંધનીય છે કે 15 ઓગસ્ટ અને 26 જાન્યુઆરીની આસપાસના સમયગાળા દરમિયાન દિલ્હી પર આતંકવાદી હુમલાનો ખતરો સૌથી વધુ હોય છે. આને ધ્યાનમાં રાખીને આ વોન્ટેડ આતંકવાદીઓની યાદી સાવચેતી તરીકે બહાર પાડવામાં આવી છે જેથી સામાન્ય લોકો સતર્ક રહે અને આ શંકાસ્પદોને જોવા મળે તો તાત્કાલિક જાણ કરી શકે.
પોલીસે જનતાને અપીલ કરી છે કે જો આ શંકાસ્પદોમાંથી કોઈ દેખાય અથવા તેમના વિશે કોઈ માહિતી ઉપલબ્ધ થાય તો તાત્કાલિક તેમને જાણ કરે. પોસ્ટરોમાં પોલીસ કંટ્રોલ રૂમ (112) અને સ્પેશિયલ સેલના સંપર્ક નંબરો આપવામાં આવ્યા છે. દિલ્હી પોલીસે એમ પણ જણાવ્યું છે કે સચોટ માહિતી આપનાર કોઈપણ વ્યક્તિને યોગ્ય ઈનામ આપવામાં આવશે, અને માહિતી આપનારની ઓળખ સંપૂર્ણપણે ગુપ્ત રાખવામાં આવશે.
