મધ્યપ્રદેશના રેવા લોકસભા મતવિસ્તારનું પ્રતિનિધિત્વ કરતા ભાજપના સાંસદ જનાર્દન મિશ્રા ફરી એકવાર તેમની વિવાદાસ્પદ ટિપ્પણીઓને કારણે હેડલાઇન્સમાં આવ્યા છે. કોલકાતા-રેવા-ભોપાલ હવાઈ સેવાના પ્રારંભ નિમિત્તે રેવા એરપોર્ટ પર એક ભવ્ય કાર્યક્રમ દરમિયાન, તેમણે સ્ટેજ પરથી ઇથેનોલ-મિશ્રિત ઇંધણને બદલે શુદ્ધ પેટ્રોલની માંગ કરનારાઓ પર ટિપ્પણી કરી હતી; આ ટિપ્પણીનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે.
પોતાના સંબોધનમાં, સાંસદે પેટ્રોલમાં 20 ટકા ઇથેનોલ ભેળવવાની સરકારની નીતિને જોરદાર ટેકો આપ્યો. તેમણે નોંધ્યું કે બ્રાઝિલ જેવા દેશો મોટા પાયે ઇથેનોલનો ઉપયોગ કરે છે અને ભારતીય વાહનો પણ ઇથેનોલ પર ચલાવવા માટે સંપૂર્ણપણે સક્ષમ છે. ઇથેનોલ ભેળવવાના વિરોધ અને શુદ્ધ પેટ્રોલની માંગ વિશે બોલતા, સાંસદ જનાર્દન મિશ્રાએ કઠોર ટિપ્પણી કરી. તેમણે સ્ટેજ પરથી પૂછ્યું, “શું શુદ્ધ પેટ્રોલ તમારા પિતાના ઘરેથી આવશે? જે સમયે સાંસદ જનાર્દન મિશ્રા આ ભાષણ આપી રહ્યા હતા, તે સમયે મધ્યપ્રદેશના નાયબ મુખ્યમંત્રી રાજેન્દ્ર શુક્લા, રાજ્યમંત્રી પ્રતિભા બાગરી, સતના સાંસદ ગણેશ સિંહ અને વિવિધ ધારાસભ્યો અને વરિષ્ઠ જનપ્રતિનિધિઓ સહિત અનેક મહાનુભાવો સ્ટેજ પર હાજર હતા.
જનાર્દન મિશ્રાએ અગાઉ તેમના અપરંપરાગત અને સ્પષ્ટવક્તા નિવેદનો માટે અનેક પ્રસંગોએ રાષ્ટ્રીય ધ્યાન ખેંચ્યું છે. ’15 લાખ રૂૂપિયાના ભ્રષ્ટાચાર વિશે ફરિયાદ ન કરો’ એવું કહી ત્યારે પણ તેમણે વિવાદ છેડયો હતો.
સાંસદ દ્વારા નિવેદન આપવામાં આવતા એક વીડિયોએ રાજકીય વર્તુળો અને સોશિયલ મીડિયા પ્લેટફોર્મ પર ભારે ચર્ચા જગાવી છે. આ અભદ્ર ભાષાને લઈને વિપક્ષી પક્ષો પણ સાંસદ અને શાસક પક્ષને નિશાન બનાવવાની તૈયારી કરી રહ્યા છે.
