ભારતીય રિઝર્વ બેંકની નાણાકીય નીતિ સમિતિની બેઠકમાં લેવાયેલા નિર્ણયની જાહેરાત કરવામાં આવી છે. RBI ગવર્નર સંજય મલ્હોત્રાએ જાહેરાત કરી હતી કે રેપો રેટમાં કોઈ ફેરફાર કરવામાં આવ્યો નથી; તે 5.25% પર યથાવત છે. આનો અર્થ એ છે કે તમારી લોન EMIમાં કોઈ વધારો થશે નહીં, અને તમારી લોન પરનો વ્યાજ દર સ્થિર રહેશે.
ભારતીય રિઝર્વ બેંક (RBI) ની મોનેટરી પોલિસી કમિટી (MPC) ની બેઠકમાં વ્યાજ દરોને લઈને અત્યંત મહત્ત્વનો નિર્ણય લેવામાં આવ્યો છે. આરબીઆઈના ગવર્નર સંજય મલ્હોત્રાએ જાહેરાત કરી છે કે મોનેટરી પોલિસી કમિટીએ સર્વસંમતિથી પોલિસી રેપો રેટને 5.25% પર સ્થિર રાખવાનો મત આપ્યો છે. આ સાથે જ મધ્યસ્થ બેંકે બજારની સ્થિતિને ધ્યાનમાં રાખીને પોતાનો ‘ન્યુટ્રલ’ (તટસ્થ) અભિગમ જાળવી રાખ્યો છે.
વૈશ્વિક પરિસ્થિતિઓ અંગે ચિંતા વ્યક્ત કરતા ગવર્નર મલ્હોત્રાએ જણાવ્યું હતું કે, વેસ્ટ એશિયા (પશ્ચિમ એશિયા) માં ચાલી રહેલા સંઘર્ષ અને તણાવના કારણે વૈશ્વિક આર્થિક પરિદ્રશ્ય હજુ પણ અનિશ્ચિતતાઓથી ઘેરાયેલું છે. આ આંતરરાષ્ટ્રીય પડકારો વચ્ચે દેશમાં મોંઘવારી પર કાબૂ રાખવા અને આર્થિક વૃદ્ધિને સંતુલિત કરવા માટે આરબીઆઈએ વ્યાજ દરોમાં કોઈ ફેરફાર ન કરવાનો સુરક્ષિત નિર્ણય લીધો છે.
અગાઉ, RBI એ દરોમાં કુલ 125 બેસિસ પોઈન્ટનો ઘટાડો કર્યો હતો; જોકે, છેલ્લી નાણાકીય નીતિ બેઠક પછી કોઈ ફેરફાર થયા નથી. ફુગાવા અંગે, ભારતનો છૂટક ફુગાવાનો દર એપ્રિલ 2026 માં વધીને 3.48% થયો, જે RBI ના મધ્યમ ગાળાના લક્ષ્ય 4% થી નીચે રહ્યો.
