મેટાએ એક મોટી જાહેરાત કરી છે જેની સીધી અસર સોશિયલ મીડિયા અને મેસેજિંગ એપ્સના ઉપયોગ પર પડશે. ઇન્સ્ટાગ્રામ, ફેસબુક અને વોટ્સએપ માટે હવે નવા પેઇડ સબ્સ્ક્રિપ્શન પ્લાન રજૂ કરવામાં આવ્યા છે. કંપનીએ વિશ્વભરના વપરાશકર્તાઓ માટે આ પ્લાન રજૂ કર્યા છે. ભારતમાં યુઝર્સ માટે નવી પેઇડ સબસ્ક્રિપ્શન યોજનાઓ જાહેર કરી છે. મેટા હવે આ એપ્સના Plus (પ્લસ) વર્ઝન લોન્ચ કરી રહી છે, જેમાં પૈસા ચૂકવનારા યુઝર્સને એવા એડવાન્સ ફીચર્સ મળશે જે સામાન્ય યુઝર્સને નહીં મળે.
મેટાની વ્યૂહરચનાનો હેતુ તેની કમાણી વધારવાનો છે. આ પગલાથી એ સ્પષ્ટ થાય છે કે કંપની હવે તેની આવક માટે ફક્ત જાહેરાત પર આધાર રાખવા માંગતી નથી; તેણે હવે આવક પેદા કરવા માટે એક નવો માર્ગ શોધી કાઢ્યો છે.
મેટાએ હાલમાં વૈશ્વિક કિંમતો જાહેર કરી છે
ઇન્સ્ટાગ્રામ પ્લસ: $3.99 (આશરે 387 રૂપિયા) પ્રતિ મહિનો
ફેસબુક પ્લસ : $3.99 (આશરે 387 રૂપિયા) પ્રતિ મહિનો
વૉટ્સએપ પ્લસ : $2.99 (આશરે 290 રૂપિયા) પ્રતિ મહિનો
આ નવું સબસ્ક્રિપ્શન ‘મેટા વેરિફાઇડ’ કરતાં તદ્દન અલગ છે. બ્લુ ટિક માટેના ચાર્જ અલગ રહેશે.
ટેકક્રંચના એક અહેવાલ મુજબ, વોટ્સએપ પ્લસ વ્યક્તિગત મેસેજિંગ અનુભવો પર ખાસ ધ્યાન કેન્દ્રિત કરીને, ઘણી બધી વિશિષ્ટ સુવિધાઓ પ્રદાન કરશે. વોટ્સએપ સબ્સ્ક્રાઇબર્સને કસ્ટમ થીમ્સ, અનન્ય રિંગટોન, પ્રીમિયમ સ્ટીકરો અને વધુ સંખ્યામાં ચેટ્સ પિન કરવાની ક્ષમતા મળશે.
જયારે ઇન્સ્ટાગ્રામ પ્લસ અને ફેસબુક પ્લસના સબ્સ્ક્રાઇબર્સને પણ ઘણી વિશિષ્ટ સુવિધાઓ પ્રાપ્ત થશે. પૈસા ચૂકવનારા યુઝર્સને ઇન્સ્ટાગ્રામ સ્ટોરીઝમાં જબરદસ્ત ફીચર્સ મળશે જેમ કે, તમે કોઈની પણ સ્ટોરી તેની વ્યુઅર લિસ્ટમાં આવ્યા વગર સિક્રેટલી જોઈ શકશો. તમારી સ્ટોરી કયા યુઝરે કેટલી વાર ‘રીવોચ’ (ફરીથી જોઈ) કરી તે જાણી શકાશે. ક્લોઝ ફ્રેન્ડ્સ સિવાય પણ તમે સ્ટોરીઝ માટે અનલિમિટેડ ઓડિયન્સ લિસ્ટ બનાવી શકશો. સ્ટોરીઝને 24 કલાકથી વધુ સમય માટે રાખી શકાશે અને અઠવાડિયામાં એક સ્ટોરીને સ્પેશિયલ હાઇલાઇટ કરી શકાશે. બાયો માટે ખાસ ફોન્ટ્સ, કસ્ટમ એપ આઇકોન અને એનિમેટેડ સુપર હાર્ટ રિએક્શન મળશે.
મેટાના નવા સબ્સ્ક્રિપ્શન પ્લાન “મેટા વેરિફાઇડ” કરતા અલગ છે. હકીકતમાં, મેટા વેરિફાઇડ એ કંપનીની હાલની પેઇડ સેવા છે, જેમાં ઓળખ ચકાસણી અને પ્રાથમિકતા ગ્રાહક સપોર્ટ જેવી સુવિધાઓ શામેલ છે.
મેટાએ માત્ર સોશિયલ મીડિયા જ નહીં, પણ AI યુઝર્સ, ક્રેડિટર્સ અને બિઝનેસ માટે પણ “Meta One” પ્લાન્સ લોન્ચ કર્યા છે. જે લોકો મેટા એઆઈનો બહુ વધારે ઉપયોગ કરે છે તેમણે હવે નીચે મુજબના પ્લાન લેવા પડશે.
મેટાએ વાસ્તવમાં તેના AI સબ્સ્ક્રિપ્શન પ્લાન બે અલગ-અલગ સ્તરોમાં લોન્ચ કર્યા છે. પહેલો “મેટા વન પ્લસ” પ્લાન છે, જેની કિંમત દર મહિને $7.99 (આશરે ₹775) છે. આ પ્લાન એવા વપરાશકર્તાઓ માટે ડિઝાઇન કરવામાં આવ્યો છે જેઓ છબીઓ અને વિડિઓઝ જનરેટ કરવા અથવા જટિલ તર્ક કાર્યો પૂર્ણ કરવા જેવા કાર્યો માટે મેટા AIનો ભારે ઉપયોગ કરે છે.
બીજો પ્લાન “મેટા વન પ્રીમિયમ” તરીકે ઓળખાતો વધુ કિંમતનો વિકલ્પ છે. તેની કિંમત દર મહિને $19.99 (આશરે ₹1,939) છે. આ પ્લાનમાં મેટા વન પ્લાનમાં આપવામાં આવતી બધી સુવિધાઓનો સમાવેશ થાય છે, પરંતુ વપરાશ મર્યાદા નોંધપાત્ર રીતે વધારે છે.
ક્રેએટર્સ અને બિઝનેસ માટેના પ્લાન્સ
Meta One Essential ($14.99 / આશરે 1,454 રૂપિયા મહિનાના): પ્રોફાઇલ પ્રોટેક્શન અને ક્રિએટર્સ માટે એન્હાન્સ્ડ પ્રોફાઇલ લિંક્સ મળશે
Meta One Advanced ($49.99 / આશરે 4,849 રૂપિયા મહિનાના): રીલ્સ પર મોટું ‘Follow’ બટન, ફેસબુક ફીડ અને સર્ચમાં પ્રાયોરિટી (વધુ રીચ), અને સૌથી મહત્વનું- લાઇવ હ્યુમન કસ્ટમર સપોર્ટ મળશે, જેની નાના વેપારીઓ વર્ષોથી રાહ જોતા હતા. આ ઉપરાંત જો કોઈ તમારી કન્ટેન્ટ ક્રેડિટ આપ્યા વગર રીપોસ્ટ કરશે તો મેટા તમને એલર્ટ પણ મોકલશે.
