મુખ્યમંત્રી વિજયે વચન નિભાવ્યું, રાજ્યની તિજોરી પર 2,044 કરોડનો બોજ
તમિલનાડુ સરકાર દ્વારા ખેડૂતોના હિતમાં એક ઐતિહાસિક નિર્ણય લેવામાં આવ્યો છે. મુખ્યમંત્રીએ રાજ્યના સીમાંત ખેડૂતો માટે સહકારી બેંકો દ્વારા આપવામાં આવેલી ₹50,000 સુધીની પાક લોન માફ કરવાની જાહેરાત કરી છે. આ સાથે મોટા ખેડૂતોને પણ ₹5,000 સુધીના દેવા માફીનો લાભ મળશે. સરકારના આ નિર્ણયથી રાજ્યના અંદાજે 14.22 લાખ ખેડૂતોને સીધો લાભ થશે, જેની પાછળ તિજોરી પર ₹2,044 કરોડનો બોજ આવશે.
સરકાર દ્વારા સ્પષ્ટ કરવામાં આવ્યું છે કે, આ માફીની રકમ સીધી સંબંધિત સહકારી બેંકોના ખાતામાં ટ્રાન્સફર કરવામાં આવશે. આ પ્રક્રિયાનો મુખ્ય ઉદ્દેશ્ય ખેડૂતોના માથે રહેલા દેવાના બોજને સંપૂર્ણપણે દૂર કરવાનો છે. હવામાનની અનિશ્ચિતતા અને બજારમાં પાકના યોગ્ય ભાવ ન મળવાને કારણે આર્થિક ભીંસ અનુભવતા ખેડૂતો માટે આ જાહેરાત એક મોટી રાહત સમાન છે.
સરકાર ટૂંક સમયમાં આ યોજનાની માર્ગદર્શિકા જાહેર કરશે અને તમામ જિલ્લા કલેક્ટરોને પાત્ર ખેડૂતોની યાદી તૈયાર કરવાના નિર્દેશ આપવામાં આવ્યા છે. નોંધનીય છે કે રાજ્યમાં કાવેરી નદી પર કર્ણાટક દ્વારા પ્રસ્તાવિત ‘મેકેદાતુ ડેમ પ્રોજેક્ટ’ અંગે પણ ઉચ્ચ સ્તરીય બેઠક યોજાઈ હતી. મુખ્યમંત્રીની અધ્યક્ષતામાં મળેલી આ બેઠકમાં રાજ્યના જળ અધિકારોનું રક્ષણ કરવા પર ભાર મૂકવામાં આવ્યો હતો.
તમિલનાડુ સરકાર આ પ્રોજેક્ટનો સખત વિરોધ કરી રહી છે, કારણ કે આ ડેમને કારણે રાજ્યના ખેડૂતોને મળતા પાણીના હિસ્સામાં ઘટાડો થઈ શકે છે. કર્ણાટકમાં થયેલા ભૂમિપૂજન બાદ હવે તમિલનાડુ સરકાર આ મામલે કાયદાકીય અને વહીવટી લડત વધુ તેજ કરશે.
