અટલ બ્રિજ પરથી મહિલાએ લગાવી મોતની છલાંગ, કેબ ડ્રાઈવરે વાળ પકડીને બચાવ્યો જીવ, જુઓ વિડીયો

મુંબઈના અટલ સેતુ પુલ પર એક ચોંકાવનારી ઘટના સામે આવી છે. મુંબઈમાં અટલ બિહારી વાજપેયી ટ્રાન્સ હાર્બર લિન્ક બ્રિજ પરથી 57 વર્ષની એક મહિલાએ આત્મહત્યા માટે દરિયામાં છલાંગ લગાવી હતી. જોકે તે જ ક્ષણે કેબ ડ્રાઈવરે તેને પકડી લીધી. થોડીક સેકન્ડ બાદ પોલીસની ટીમ આવી પહોંચી અને પોલીસે પોતાનો જીવ જોખમમાં મૂકીને હિંમત દાખવી અને રેલિંગ પર ચડીને મહિલાનો જીવ બચાવ્યો. આ ઘટનાનો વીડિયો સામે આવ્યો છે.

પોલીસ અધિકારીઓના જણાવ્યા અનુસાર, 56 વર્ષીય મહિલા રીમા મુકેશ પટેલ મુંબઈના મુલુંડની રહેવાસી છે. રીમાએ કેબ બુક કરાવી હતી અને અટલ સેતુ પુલની વચ્ચે પહોંચીને ડ્રાઈવરને કાર રોકવા કહ્યું. કારમાંથી નીચે ઉતર્યા બાદ રીમા પુલની રેલિંગ પર ચઢી. અટલ સેતુ પર વિવિધ સ્થળોએ સીસીટીવી લગાવવામાં આવ્યા છે. આથી કંટ્રોલ રૂમનું ધ્યાન મહિલા પર પડ્યું.

આ પછી કંટ્રોલ રૂમમાં હાજર પોલીસે તાત્કાલિક પેટ્રોલિંગ ટીમને જાણ કરી હતી. માહિતી મળતાં જ ચાર પોલીસકર્મી લલિત શિરશત, કિરણ માત્રે, યશ સોનાવણે અને મયુર પાટીલ તરત જ ત્યાંથી નીકળી ગયા હતા. પોલીસકર્મીઓ ઘટનાસ્થળે પહોંચવાના જ હતા કે મહિલાએ દરિયામાં છલાંગ લગાવી, પરંતુ કેબ ડ્રાઈવરે ઝડપથી મહિલાને એક હાથે પકડી લીધી.

આ પછી પોલીસની ટીમ થોડી જ સેકન્ડોમાં પહોંચી ગઈ અને ચારેય પોલીસકર્મીઓ પુલની રેલિંગ પર ચઢી ગયા અને કેબ ડ્રાઈવરની મદદથી મહિલાને બચાવી લીધી. સ્ત્રી ગૃહિણી છે. તેણે આ પગલું કેમ ભર્યું તે હજુ સ્પષ્ટ થયું નથી. હાલ પોલીસ ટીમે આ મામલે તપાસ શરૂ કરી છે.