કાર લઇ સોની બજારમાં રેકી કરી હતી, બંનેએ મુંબઇ જેલમાં સાથે રહેલા મિત્રને પણ ચોરીમાં સાથે લીધો
તિજોરી ન તૂટતા 10 લાખનું સોનુ બચી ગયું, ઝડપાયેલા છ આરોપીની સઘન પૂછતાછ
સોની બજારમાં નવા નાકા રોડ પર આવેલ અમિત જવેલર્સ નામની પેઢીમાં પરોઢિયે ત્રાટકેલા તસ્કરોએ તિજોરી તોડવાનો પ્રયાસ કર્યો હતો. જેમાં નિષ્ફળતા મળતાં નોટ ગણવાનાં બે મશીન લઈ ભાગી ગયા હતા.એ-ડિવિઝન પોલીસે સીસીટીવી કેમેરાના આધારે ચોરીમાં સામેલ છ સભ્યોની ટોળકીને ઝડપી લીધી હતી.આરોપીઓ આર્થિકભીંસમાં મુકાતા ચોરી કરવાનો પ્લાન ઘડ્યો હતો.
પેઢીના માલિક મનિષભાઈ રાણપરા (ઉ.વ.પ7, રહે. પંચનાથ શેરી નં.16, ડીજીબ પેલેસ એપાર્ટમેન્ટ)ને સવારે છએક વાગ્યે જાણ થતાં પેઢીએ દોડી ગયા હતા. જોયું તો મુખ્ય લાકડાના દરવાજાના તમામ લોક તૂટેલા હતા. તિજોરી તોડવાનો પ્રયાસ થયો હતો. બે કેમેરા પણ તૂટેલા જોવા મળ્યા હતા. તસ્કરો નોટ ગણવાના બે મશીન ચોરી ગયા હતા. જે અંગે એ-ડિવિઝન પોલીસ મથકમાં ફરિયાદ નોંધાવતાં પીએસઆઈ એસ.એમ. રાણા અને એલસીબીની ટીમોએ તપાસમાં ઝંપલાવ્યું હતું.
સીસીટીવી કેમેરાના આધારે ભેદ ઉકેલી પોલીસે છ આરોપીઓને ઝડપી લીધા હતા. જેમાં શુભમ સુભાષભાઈ સોની (રહે. બાંદ્રા વેસ્ટ, મુંબઈ), ભાવીક કિરણભાઈ સીતાપરા (રહે. રાધેશ્યામ સોસાયટી-ર), જયદિપ નરેશ કાકડીયા (રહે. હિરા વીલા કોમ્પલેક્ષ, સ્પીડવેલ પાર્ટી પ્લોટ પાસે), મિલન દિલીપભાઈ ગોંડલીયા (રહે. સનાતન પાર્ક શેરી નં.4, કોઠારીયા રોડ), ધવલ દિલીપભાઈ સુરેલા (રહે. તિરૂૂપતી સોસાયટી શેરી નં.10, કોઠારીયા ચોકડી) અને રાકેશ કાળુભાઈ બોરસણીયા (રહે. તિરૂૂપતિ સોસાયટી શેરી નં.10, કોઠારીયા રોડ)નો સમાવેશ થાય છે.
પોલીસે જણાવ્યું કે આરોપી શુભમ ગોલ્ડ ચોરીના ગુનામાં મુંબઈની આર્થર રોડ જેલમાં બંધ હતો. તે વખતે આરોપી મિલનનો ભાઈ ધવલ પણ ત્યાં જ સાયબર ક્રાઈમના ગુનામાં હતો.જેને કારણે બંને વચ્ચે પરિચય થયો હતો. એટલું જ નહીં મિલન સાથે પણ પરિચય થયો હતો.છએ આરોપીઓને હાલ પૈસાની જરૂૂર હતી.જે માટે ચોરી કરવાની યોજના બનાવી બે દિવસ પહેલાં શુભમને ખાસ મુંબઈથી બોલાવ્યો હતો.ત્યાર પછી ગઈકાલે આરોપીઓ આઈ-ર0 કાર લઈ સોની બજારમાં રેકી કરવા પહોંચ્યા હતા. જે દરમિયાન અમિત જવેલર્સના દરવાજા લાકડાના હોવાથી તેમાં આસાનીથી ચોરી કરી શકાશે તેવું નકકી કરી પરોઢિયે ત્રાટક્યા હતા. જોકે તિજોરી નહીં તૂટતાં મોટી મત્તા હાથમાં આવી ન હતી. તે વખતે તિજોરીમાં રૂૂા.દસેક લાખનું સોનું હતું તેમ પોલીસ સૂત્રોએ જણાવ્યું હતું.
આ કામગીરી એ ડીવીઝન પોલીસ સ્ટેશનના ઇન્ચાર્જ પીઆઇ જે.આર.દેસાઇની રાહબરીમાં પો.સબ.ઈન્સ એસ.એમ.રાણા, એ.એસ.આઇ. બી.વી.ગોહિલ, એમ.એસ.મકવાણા, કલ્પેશભાઈ બોરીચા, મહેશભાઈ ચાવડા, સાગરભાઈ માવદીયા, કનુભાઇ બસીયા અને એલ.સી.બી. ઝોન – 2 ના પીએસઆઇ આર.એચ. ઝાલા, એ.એસ.આઈ. જે.વી. ગોહીલ, હરપાલસિંહ જાડેજા, રાજેશભાઇ મિયાત્રા, ધર્મરાજસિંહ ઝાલા, શક્તિસિંહ ગોહીલ, હેમેંદ્રભાઇ વાધીયા, પી.સી. કુલદીપસિંહ રાણા અને શિવભદ્રસિંહ ગોહીલે કરી હતી.