મતદાન મથક, સંવેદનશીલ વિસ્તારોની લીધી મુલાકાત
અસામાજિક તત્વો પર વોચ રાખવા શહેરના તમામ પોલીસ અધિકારીઓને કડક સૂચના
સ્થાનિક સ્વરાજની આગામી ચૂંટણીઓને ધ્યાનમાં રાખીને જામનગરમાં વહીવટી તંત્ર અને પોલીસ વિભાગ સજ્જ બન્યું છે. રાજકોટ રેન્જ આઈ.જી. નિર્લિપ્ત રાયે જામનગરની મુલાકાત લઈ કાયદો અને વ્યવસ્થાની સ્થિતિની સમીક્ષા કરી હતી. રેન્જ આઈ.જી.ખુદ પેટ્રોલિંગમાં નિકળ્યા હતાં. કલેકટર પરિમલ પંડ્યા, એસ.ડી.એમ., મામલતદાર સહિત ચૂંટણી વિભાગ અને વહીવટી તંત્રના અધિકારીઓ હાજર રહ્યા હતા. આઈ.જી. રાયે ઇ.વી.એમ. મશીન સ્ટોર રૂૂમ, સંવેદનશીલ મતદાન મથકો અને સંવેદનશીલ વિસ્તારોની મુલાકાત લીધી હતી.
શહેરના વોર્ડ નંબર 12 ના સંવેદનશીલ વિસ્તાર પટણીવાડ ના મતદાન મથકો આવેલા છે તે કાલાવડ નાકા બહાર આવેલા સ્કૂલમાં નિરીક્ષણ કર્યું અને સંવેદન વિસ્તાર વોર્ડ નંબર 12ના પટણીવારમાં રેન્જ આઈજી નિર્લિપ્ત રાય દ્વારા ફૂટ પેટ્રોલિંગ પણ કરવામાં આવ્યું હતું.
રેન્જ આઈ.જી.નિર્લિપ્ત રાય એ ખાસ કરીને ઓશવાળ સેન્ટર ખાતે રાખવામાં આવેલા ઇ.વી એમ. ડિસ્પેચ મશીન અને સ્ટ્રોંગ રૂૂમનું નિરીક્ષણ કર્યું હતું. તેમણે ચૂંટણી પ્રક્રિયામાં કોઈ ક્ષતિ ન રહે તે માટે સ્થળ પર હાજર અધિકારીઓને જરૂૂરી માર્ગદર્શન અને કડક સૂચનાઓ આપી હતી.
આ મુલાકાત દરમિયાન જામનગર જિલ્લા પોલીસ વડા ડો. રવિ મોહન સૈની, ડી.વાય.એસ.પી. જયવીરસિંહ ઝાલા, તેમજ એસ.ઓ.જી. અને એલ.સી.બી. સહિતના પોલીસ કાફલા સાથે મહત્વની બેઠક યોજાઈ હતી. બેઠકમાં ચૂંટણી લક્ષી ચુસ્ત પોલીસ બંદોબસ્તની ગોઠવણી, અસામાજિક તત્વો પર કડક વોચ રાખવી અને સંવેદનશીલ વિસ્તારોમાં પેટ્રોલિંગ વધારવા જેવા મુદ્દાઓ પર ભાર મૂકવામાં આવ્યો હતો.
આઈ.જી. રાયે જણાવ્યું હતું કે, “ચૂંટણી પ્રક્રિયા શાંતિપૂર્ણ રીતે સંપન્ન થાય અને કાયદો-વ્યવસ્થા જળવાઈ રહે તે માટે પોલીસ વિભાગ સંપૂર્ણ રીતે કટિબદ્ધ છે.” હાલમાં ચૂંટણી વિભાગના અધિકારીઓ અને પોલીસ જવાનો દ્વારા સુરક્ષાના કડક બંદોબસ્ત વચ્ચે સમગ્ર વ્યવસ્થાનું મોનિટરિંગ કરવામાં આવી રહ્યું છે.