રૂા.2,654 કરોડના ખર્ચે નિર્માણ પામેલા રાજકોટ ઇન્ટરનેશનલ એરપોર્ટના કાર્ગો સેક્ટરમાં પાણીના લીકેજની સમસ્યા સામે આવી છે. પાઇપલાઇનમાંથી સતત પાણી લીક થવાને કારણે કાર્ગો ફ્લોર પર પાણી ફરી વળ્યું છે. છેલ્લા બે દિવસથી સર્જાયેલી આ સ્થિતિને કારણે કાર્ગો કામગીરી ખોરવાઈ છે. પાણી ઇલેક્ટ્રિક બોર્ડ સુધી પહોંચી જતાં શોર્ટ સર્કિટની ભીતિ પણ ઊભી થઈ છે. કર્મચારીઓની સુરક્ષાને ધ્યાનમાં રાખીને કામગીરી અટકાવવાની ફરજ પડી હોવાનું જાણવા મળ્યું છે.
પ્રાપ્ત વિગતો મુજબ, રાજકોટ ઇન્ટરનેશનલ એરપોર્ટના કાર્ગો સેક્ટરમાં પાઇપલાઇનમાંથી સતત પાણી લીક થઈ રહ્યું છે. તેના કારણે ફ્લોર પર પાણી ભરાતાં ત્યાં કામ કરતા કર્મચારીઓ માટે જોખમ ઊભું થયું છે. પાણી ઇલેક્ટ્રિક બોર્ડ સુધી પહોંચી જતાં શોર્ટ સર્કિટ અથવા અન્ય કોઈ દુર્ઘટના સર્જાવાની આશંકા વ્યક્ત કરવામાં આવી રહી છે. આવી સ્થિતિમાં કર્મચારીઓની સલામતી જોખમાય નહીં તે માટે કાર્ગો કામગીરી અટકાવવામાં આવી છે.
આ સમસ્યાની સીધી અસર માલસામાનના પરિવહન પર પણ પડી છે. લીકેજને કારણે સર્જાયેલી પરિસ્થિતિમાં ઇન્ડિગો એરલાઇન્સનો અંદાજે રૂૂ. 2 લાખની કિંમતનો ચાર ટન માલ લોડ થઈ શક્યો નથી. પરિણામે કાર્ગો કામગીરીમાં વિક્ષેપ પડ્યો છે અને માલસામાનના સમયસર પરિવહનને લઈને પણ પ્રશ્નો ઊભા થયા છે.
ઉલ્લેખનીય છે કે રાજકોટ ઇન્ટરનેશનલ એરપોર્ટનું નિર્માણ રૂૂ. 2,654 કરોડના ખર્ચે કરવામાં આવ્યું છે. આટલા મોટા ખર્ચે તૈયાર થયેલા એરપોર્ટના કાર્ગો સેક્ટરમાં પાણીના લીકેજ જેવી સમસ્યા સામે આવતાં પાયાની સુવિધાઓની જાળવણી અને સમયસર સમારકામ અંગે સવાલો ઊભા થયા છે. ખાસ કરીને ઇલેક્ટ્રિક બોર્ડ સુધી પાણી પહોંચવાની સ્થિતિ કર્મચારીઓની સુરક્ષાના દૃષ્ટિકોણથી ગંભીર બની છે.
