કેન્દ્ર સરકારે પડોશી દેશોના નાગરિકો માટે પાસપોર્ટ અને વિઝાના નિયમો વધુ કડક બનાવ્યા છે. કેન્દ્રીય ગૃહ મંત્રાલય દ્વારા આ અંગે નવી નોટિફિકેશન જાહેર કરવામાં આવી છે. નવા નિયમોની સીધી અસર પાકિસ્તાન, બાંગ્લાદેશ અને અફઘાનિસ્તાનથી આવતા કેટલાક લઘુમતી સમુદાયોના લોકો પર પડશે. હવે ભારતમાં રહેવા માટે તેમણે નિર્ધારિત શ્રેણીનો યોગ્ય વિઝા મેળવવો ફરજિયાત રહેશે.
ભારત સરકારે પાડોશી દેશોના નાગરિકો માટે વિઝા અને પાસપોર્ટની જરૂરિયાતોને વધુ કડક બનાવતું જાહેરનામું બહાર પાડ્યું છે. આ નવા નિયમો હેઠળ, અફઘાનિસ્તાન, બાંગ્લાદેશ અને પાકિસ્તાનથી આવતા છ બિન-મુસ્લિમ સમુદાયોના લોકો માટે હવે વિઝા ફરજિયાત છે.
આ નિયમો એવા વ્યક્તિઓને લાગુ પડે છે જેઓ ધાર્મિક અત્યાચાર અથવા તેના ભયને કારણે ૩૧ ડિસેમ્બર, ૨૦૨૪ના રોજ કે તે પહેલાં ભારતમાં પ્રવેશ્યા હતા. આવા વ્યક્તિઓ પાસે કાં તો આગમન સમયે માન્ય મુસાફરી દસ્તાવેજો નહોતા અથવા તેમના દસ્તાવેજોની મુદત ત્યારબાદ સમાપ્ત થઈ ગઈ હતી. બુધવારે બહાર પાડવામાં આવેલા તાજેતરના જાહેરનામા મુજબ, આવા વ્યક્તિઓએ હવે ભારતમાં રહેવા માટે યોગ્ય શ્રેણીના વિઝા મેળવવા પડશે.
આ નવા નિયમો હિન્દુ, શીખ, બૌદ્ધ, જૈન, પારસી અને ખ્રિસ્તી સમુદાયના સભ્યોને લાગુ પડે છે. અગાઉ, સપ્ટેમ્બર ૨૦૨૫માં બહાર પાડવામાં આવેલા એક આદેશ હેઠળ, અફઘાનિસ્તાન, બાંગ્લાદેશ અને પાકિસ્તાનથી આવતા આ સમુદાયોના લોકોને પાસપોર્ટ અને વિઝાની જરૂરિયાતોમાંથી મુક્તિ આપવામાં આવી હતી.
ભારત, નેપાળ અને ભૂટાનના નાગરિકોએ આ દેશો વચ્ચે મુસાફરી કરતી વખતે હવે ‘વિઝા મેન્યુઅલ’માં નિર્દિષ્ટ કર્યા મુજબના માન્ય ઓળખ દસ્તાવેજો રજૂ કરવા પડશે. વધુમાં, નેપાળ કે ભૂટાન થઈને ત્રીજા દેશમાં મુસાફરી કરતા કોઈપણ ભારતીય નાગરિક પાસે માન્ય પાસપોર્ટ હોવો આવશ્યક છે અને તેમણે હવે નિર્ધારિત ચેકપોઇન્ટ્સ (તપાસ નાકા) પરથી પસાર થવું ફરજિયાત છે.
આ ઉપરાંત, ચીન, પાકિસ્તાન, હોંગકોંગ કે મકાઉ થઈને ભારત આવતા નેપાળ અને ભૂટાનના નાગરિકો માટે હવે માન્ય પાસપોર્ટ અને વિઝા રજૂ કરવા ફરજિયાત બની ગયા છે. કેન્દ્ર સરકારે શ્રીલંકન તમિલ શરણાર્થીઓ અને હાલમાં ભારતમાં વસતા તિબેટીયન નાગરિકો માટે પાસપોર્ટ અને વિઝા અંગેની અગાઉની કાયદાકીય છૂટછાટો યથાવત રાખી છે.
