એશિયાટિક સિંહોના ગઢ ગણાતા અમરેલી જિલ્લામાં ફરી એકવાર વનરાજ માટે માઠા સમાચાર સામે આવ્યા છે. ભાવનગર-સોમનાથ નેશનલ હાઈવે પર એક અજાણ્યા વાહને સિંહબાળને અડફેટે લેતા તેનું કરુણ મોત નિપજ્યું છે. આ ઘટનાને પગલે વન્યજીવ પ્રેમીઓમાં ભારે રોષ અને શોકની લાગણી જોવા મળી રહી છે.
મળતી માહિતી મુજબ, રાજુલા તાલુકાના દાતરડી ગામ પાસેથી પસાર થતા ભાવનગર-સોમનાથ નેશનલ હાઈવે પર આ અકસ્માત સર્જાયો હતો. આશરે 1 વર્ષની ઉંમરનું સિંહબાળ રસ્તો ઓળંગી રહ્યું હતું, ત્યારે પૂરપાટ ઝડપે આવતા કોઈ અજાણ્યા વાહને તેને જોરદાર ટક્કર મારી હતી. ટક્કર એટલી ભયાનક હતી કે માસૂમ સિંહબાળનું ઘટનાસ્થળે જ મોત નિપજ્યું હતું.
આ કોઈ પહેલી ઘટના નથી જ્યારે હાઈવે પર વન્યજીવોએ પોતાનો જીવ ગુમાવ્યો હોય. અગાઉ પણ આ વિસ્તારમાં અનેકવાર સિંહ અને દીપડાઓના વાહનોની અડફેટે કે ટ્રેનની નીચે આવી જવાથી મોતના બનાવો બની ચૂક્યા છે. વારંવાર બનતી આવી ઘટનાઓ વન વિભાગ અને તંત્રની કામગીરી પર અનેક સવાલો ઉભા કરે છે. શું હાઈવે પર વન્યજીવોની અવરજવર વાળા વિસ્તારોમાં સ્પીડ લિમિટનું પાલન થાય છે? શું વન વિભાગ દ્વારા આ વિસ્તારોમાં પૂરતું પેટ્રોલિંગ કરવામાં આવે છે? સિંહોની સુરક્ષા માટે લેવાતા પગલાંઓ માત્ર કાગળ પર જ સીમિત છે?
દેશની શાન ગણાતા સાવજો જ્યારે આ રીતે અકાળે મોતના મુખમાં ધકેલાય છે, ત્યારે પ્રકૃતિ પ્રેમીઓમાં ઘેરા પ્રત્યાઘાતો પડી રહ્યા છે. સ્થાનિક લોકો અને સિંહપ્રેમીઓ દ્વારા માંગ કરવામાં આવી રહી છે કે જવાબદાર વાહનચાલક સામે કડક કાર્યવાહી કરવામાં આવે અને ભવિષ્યમાં આવી ઘટનાઓ ન બને તે માટે હાઈવે પર યોગ્ય ફેન્સિંગ અથવા અન્ડરપાસ જેવી વ્યવસ્થાઓ કરવામાં આવે.
