અમરેલી જિલ્લાની સાવરકુંડલા નગરપાલિકા ચૂંટણીમાં એક અનોખી રાજકીય ઘટના સામે આવી છે. વોર્ડ નંબર 6માં એક જ પરિવારના સભ્યોના નામ ત્રણ મુખ્ય રાજકીય પક્ષો ભાજપ, કોંગ્રેસ અને આમ આદમી પાર્ટીની યાદીમાં જોવા મળતા રાજકીય વર્તુળોમાં ભારે ચર્ચા જાગી છે.
નેસડી રોડ પર રહેતા પોપટભાઈ જમોડ, જેઓ ભાજપના સક્રિય કાર્યકર તરીકે ઓળખાય છે, તેમને ભાજપ દ્વારા સત્તાવાર રીતે ટિકિટ આપવામાં આવી હતી અને તેમનું નામ પાર્ટીની યાદીમાં જાહેર કરાયું હતું. આ ઉપરાંત, આમ આદમી પાર્ટી દ્વારા પણ તેમને ઉમેદવાર તરીકે જાહેર કરવામાં આવ્યા હતા.
જોકે, રાજકીય વળાંક ત્યારે આવ્યો જ્યારે પોપટભાઈના એક નજીકના સાથીદારને ભાજપ તરફથી ટિકિટ ન મળી. આ નારાજગીના પગલે, પોપટભાઈ જમોડે પોતાની પત્ની હંસાબેન જમોડના નામે કોંગ્રેસમાંથી ઉમેદવારી ફોર્મ ભરાવ્યું.
આમ, એક જ પરિવાર ભાજપ અને કોંગ્રેસ બંને સાથે જોડાયેલો દેખાયો. પોપટભાઈ જમોડે આ અંગે જણાવ્યું કે ભાજપે તેમને ચૂંટણી લડવા માટે પૂછ્યું હતું અને તેમણે સંમતિ આપી હતી. પરંતુ, તેમના એક સાથી મિત્રને ટિકિટ ન મળતા તેમણે પત્નીનું કોંગ્રેસમાંથી ફોર્મ ભરવાનો નિર્ણય કર્યો.
આ ઘટના બાદ ભાજપ, કોંગ્રેસ અને આમ આદમી પાર્ટીની સત્તાવાર યાદીઓ સોશિયલ મીડિયા પર વાયરલ થઈ છે. એક જ પરિવારના સભ્યોના નામ ત્રણ રાજકીય પક્ષો સાથે જોડાયેલા હોવા છતાં, અંતે કોંગ્રેસમાંથી ઉમેદવારી નોંધાવવામાં આવી છે. આ રાજકીય ઘટનાએ સાવરકુંડલામાં ભારે ચર્ચા જગાવી છે.