ચૂંટણી પંચે તૃણમૂલ કોંગ્રેસના બંને જૂથોને ચૂંટણી ચિહ્નો ફાળવ્યા છે. મમતા બેનર્જીના નેતૃત્વ હેઠળના જૂથનું નામ ’ઓલ ઈન્ડિયા તૃણમૂલ કોંગ્રેસ’ (AITMC) રહેશે અને તેમને ’ફૂટબોલર’નું ચૂંટણી ચિહ્ન ફાળવવામાં આવ્યું છે. બીજી તરફ, અરૂૂપ રોયના નેતૃત્વ હેઠળના જૂથને ’ડેમોક્રેટિક તૃણમૂલ કોંગ્રેસ’ નામ અને ’પરબીડિયું’ (એન્વલપ)નું ચૂંટણી ચિહ્ન આપવામાં આવ્યું છે.
અગાઉ, ચૂંટણી પંચે TMCના ચિહ્ન પર રોક લગાવી દીધી હતી, જેનાથી પક્ષના બંને જૂથોને ફટકો પડ્યો હતો. પરિણામે, હવે બંને જૂથો આગામી પેટાચૂંટણીઓ તેમના નવા પક્ષના નામ અને ચિહ્નો હેઠળ લડશે.
બંને જૂથોએ ત્રણ-ત્રણ વિકલ્પો રજૂ કર્યા બાદ, પંચે તેમને નવા ચિહ્નોનો ઉપયોગ કરવાની મંજૂરી આપી હતી. આ પહેલાં, ગુરુવારે પંચે મમતા બેનર્જીની તૃણમૂલ કોંગ્રેસ અને ધારાસભ્ય રિતાબ્રત બેનર્જીના નેતૃત્વ હેઠળના બળવાખોર જૂથ – બંનેને આગામી પેટાચૂંટણીમાં TMC નામ અને ચિહ્નનો ઉપયોગ કરવાથી રોક્યા હતા.ગુરુવારે રાત્રે જારી કરાયેલા એક વચગાળાના આદેશમાં – મમતા બેનર્જી અને અરૂૂપ રોયના નેતૃત્વ હેઠળના જૂથોના નેતાઓ સાથેની સુનાવણી બાદ – ચૂંટણી પંચે જણાવ્યું હતું કે આ બાબતે ’ચૂંટણી ચિહ્ન (આરક્ષણ અને ફાળવણી) આદેશ, 1968’ની જોગવાઈઓ હેઠળ નિર્ણાયક નિર્ણય લેવાની જરૂૂર છે. પંચે આદેશ આપ્યો હતો કે જ્યાં સુધી અંતિમ નિર્ણય ન લેવાય ત્યાં સુધી, કોઈ પણ જૂથ ’તૃણમૂલ કોંગ્રેસ’ નામ અથવા પક્ષ માટે અનામત ’જોડિયા ફૂલ’ (જોડા ફૂલ) ચિહ્નનો ઉપયોગ કરી શકશે નહીં.
પંચના આ નિર્ણયને મમતા માટે એક ઝટકા તરીકે જોવામાં આવી રહ્યો છે. હાથથી દોરવામાં આવેલું ’જોડિયા ફૂલ’નું ચિહ્ન 1998માં પક્ષની સ્થાપના થઈ ત્યારથી તેની ઓળખ રહ્યું છે. આ પહેલાં, મમતા બેનર્જીને તેમના પક્ષની અંદર બે મોરચે બળવાનો સામનો કરવો પડી રહ્યો હતો. મે મહિનામાં વિધાનસભા ચૂંટણીમાં મળેલી હાર બાદ, તૃણમૂલ કોંગ્રેસના બે-તૃતીયાંશથી વધુ ધારાસભ્યો બળવાખોર બની ગયા હતા. બાદમાં, આ બળવો સંસદ સુધી ફેલાયો હતો. જૂન મહિનામાં, 58 બળવાખોર ધારાસભ્યોએ મમતા જૂથના ઉમેદવાર સોવનદેબ ચટ્ટોપાધ્યાયને બદલે પક્ષમાંથી હાંકી કાઢવામાં આવેલા નેતા રિતાબ્રત બેનર્જીને વિરોધ પક્ષના નેતા તરીકે પસંદ કર્યા અને વિધાનસભાના અધ્યક્ષ પાસેથી તેમને માન્યતા પણ અપાવી.
પાંચ દિવસ બાદ આ બળવો સંસદ સુધી પહોંચ્યો. વરિષ્ઠ ટીએમસી નેતા કાકોલી ઘોષ દસ્તીદારના નેતૃત્વમાં, લોકસભાના 20 સભ્યોએ ’નેશનાલિસ્ટ સિટીઝન્સ પાર્ટી ઓફ ઈન્ડિયા’ (NCPI) નામના એક અજાણ્યા પક્ષ સાથે જોડાણ કર્યું અને ભારતીય જનતા પાર્ટીના નેતૃત્વ હેઠળના એનડીએને સમર્થન જાહેર કર્યું.
