આવી ધરપકડ ગેરકાયદે, ફરી ધરપકડ માટે મેજિસ્ટ્રેટની મંજૂરી જરૂરી: સુપ્રીમ
સુપ્રીમ કોર્ટે આજે ચુકાદો આપ્યો છે કે જે પોલીસ અધિકારીએ ધરપકડના કારણો લેખિતમાં આપ્યા વિના કોઈ વ્યક્તિની ધરપકડ કરી હોય, તેની સામે શિસ્તભંગની કાર્યવાહી (વિભાગીય તપાસ) શરૂૂ કરવામાં આવવી જોઈએ.
ન્યાયમૂર્તિ ઉજ્જલ ભુયાન અને ન્યાયમૂર્તિ અતુલ એસ. ચંદુરકરની બનેલી ખંડપીઠે અવલોકન કર્યું હતું કે જો બંધારણની કલમ 22(1)ની જોગવાઈ મુજબ ધરપકડના કારણો લેખિતમાં આપવામાં ન આવ્યા હોય, તો આરોપીની ધરપકડ ગેરકાયદેસર ઠરે છે. જો તપાસ એજન્સી એવી વ્યક્તિની ફરીથી ધરપકડ કરવા માંગતી હોય કે જેની અગાઉની ધરપકડ ગેરકાયદેસર જાહેર કરવામાં આવી હતી, તો તેણે પહેલા ધરપકડના કારણો જણાવવા પડશે અને સંબંધિત મેજિસ્ટ્રેટની પરવાનગી મેળવવી પડશે. વહીવટી દ્રષ્ટિકોણથી જોઈએ તો, જે પોલીસ અધિકારી ધરપકડના કારણો જણાવવામાં નિષ્ફળ રહ્યા હોય, તેમણે આરોપીની વધુ કસ્ટડી (અટકાયત) માટે ઉપરી અધિકારી પાસેથી મંજૂરી મેળવવી પડશે.
ઉપરી અધિકારીએ આગળની તપાસ અન્ય અધિકારીને સોંપવી પડશે અને તે પોલીસ અધિકારી સામે વિભાગીય તપાસનો આદેશ આપવો પડશે. જો તપાસમાં પોલીસ અધિકારી વિરુદ્ધ પ્રતિકૂળ તારણો નીકળે, તો અધિકારીની સર્વિસ બુકમાં નોંધ સાથે વિભાગીય કાર્યવાહી થવી જોઈએ. કોર્ટે નિર્દેશ આપ્યો છે કે આ ચુકાદાની નકલ તમામ રાજ્યો અને કેન્દ્રશાસિત પ્રદેશોના પોલીસ મહાનિદેશકો (DGP)ને મોકલવામાં આવે.
સગીર સાથે જાતીય હુમલાના આરોપોના સંબંધમાં શિરોમણી અકાલી દળ (SAD) સાથે સંકળાયેલા મુલ્લાનપુર દાખા મતવિસ્તારના પ્રભારી જસકરણજીત સિંહની ધરપકડને કોર્ટે ગેરકાયદેસર જાહેર કરતી વખતે આ અવલોકનો કર્યા હતા, કારણ કે તેમને ધરપકડના કારણો જણાવવામાં આવ્યા ન હતા.
