ગાઢ નિદ્રામાં પોઢેલા કચ્છ પર મોડી રાત્રે કુદરતનો પ્રકોપ મનસૂર થયો હોય તેમ અચાનક ધરતી ધ્રુજી ઉઠતા નાગરિકો સફાળા જાગી ગયા હતા. મંગળવારે રાત્રે 10 વાગ્યાને 27 મિનિટે વાગડ પંથક સહિત આસપાસના ગ્રામ્ય વિસ્તારોમાં ભૂકંપનો હળવો આંચકો અનુભવાયો હતો. શાંત રાત્રિના સમયે આવેલા આ આકસ્મિક કંપનને લીધે સમગ્ર સરહદી જિલ્લામાં ભય અને ચિંતાનું મોજું ફરી વળ્યું હતું અને ક્ષણભર માટે લોકો સ્તબ્ધ બની ગયા હતા કે આખરે શું થઈ રહ્યું છે.
ગાંધીનગર સ્થિત ઇન્સ્ટિટ્યૂટ ઓફ સિસ્મોલોજીકલ રિસર્ચ (ISR) ના સત્તાવાર રિપોર્ટ અનુસાર, આ ભૂકંપની તીવ્રતા રિક્ટર સ્કેલ પર 3.4 ની માપવામાં આવી છે. આ કંપનનું મુખ્ય કેન્દ્રબિંદુ (એપિસેન્ટર) કચ્છના બેલા ગામ નજીક હોવાનું સામે આવ્યું છે. ભૂકંપ મધ્યમ તીવ્રતાનો હોવાના લીધે સદનસીબે કોઈપણ પ્રકારની જાનહાનિ, માલહાનિ કે મકાનો ધરાશાયી થવાના કોઈ માઠા સમાચાર વહીવટી તંત્ર સુધી પહોંચ્યા નથી, જે તંત્ર અને સ્થાનિકો માટે ખૂબ જ આશ્વાસનરૂૂપ બાબત છે.
મોડી રાત્રે અચાનક ધરતી ધ્રુજતાની સાથે જ ઘરોમાં રાખેલા વાસણો ખખડવા લાગ્યા હતા અને પંખાઓ હલતા જોઈ લોકો ગાઢ નિદ્રામાંથી સફાળા જાગી ગયા હતા. કચ્છના લોકોના મનમાંથી વર્ષ 2001 ના વિનાશક ભૂકંપના કરુણ દ્રશ્યો અને ડર આજે પણ સંપૂર્ણપણે ભૂસાયા ન હોવાથી, રાત્રિના સમયે આવતા આવા આંચકા લોકોની ઊંઘ ઉડાડી દે છે. બેલા અને નજીકના ગામડાઓમાં લોકો તાત્કાલિક ઘરોમાંથી બહાર નીકળીને ખુલ્લા મેદાનો અને રસ્તાઓ પર દોડી આવ્યા હતા અને લાંબા સમય સુધી લોકોએ ઘરની બહાર વિતાવ્યો હતો.