ગુજરાત રાજ્યના પ્રાથમિક, માધ્યમિક અને પ્રૌઢ શિક્ષણ રાજ્યમંત્રી તથા જામનગર 78- ઉત્તર વિધાનસભાના ધારાસભ્ય રીવાબા રવિન્દ્રસિંહ જાડેજાના જન્મદિવસ નિમિત્તે સમાજને સમર્પિત એકવીશંતિ સેવા સંકલ્પના: ધ 21 સેવા રિઝોલ્યુશન્સ અંતર્ગત વિવિધ 21 સેવાકીય પ્રવૃત્તિઓનું આયોજન કરવામાં આવ્યું છે. આ સેવાકીય પ્રવૃત્તિઓના માધ્યમથી અંદાજે 21,000 થી વધુ લાભાર્થીઓને પ્રત્યક્ષ કે પરોક્ષ લાભ મળશે. આ સમગ્ર કાર્યક્રમનું આયોજન આગામી 12 સપ્ટેમ્બર, શનિવારના રોજ સવારે 10.00 કલાકે જામનગરના ધન્વંતરિ ઓડિટોરીયમ ખાતે કરવામાં આવ્યું છે.
સેવા સંકલ્પ અંતર્ગત જામનગરની વિવિધ શાળાઓમાં અંદાજે રૂૂ.15 કરોડના ખર્ચે હાથ ધરાયેલા વિવિધ શૈક્ષણિક અને માળખાકીય વિકાસકાર્યોનું લોકાર્પણ કરવામાં આવશે. ઉપરાંત 100 ટકા પરિણામ મેળવનાર સરકારી શાળાઓનું સન્માન તેમજ ધોરણ 10 અને 12ના તેજસ્વી વિદ્યાર્થીઓનું સન્માન કરવામાં આવશે.
શાળાથી દૂર રહેતા વિદ્યાર્થીઓને શાળાએ આવવા-જવા માટે ઈકો ગાડીઓની વ્યવસ્થા કરવામાં આવશે. જામનગર નગર પ્રાથમિક શિક્ષણ સમિતિની 49 શાળાઓના આશરે 14,000 વિદ્યાર્થીઓને નોટબુકનું વિતરણ કરવામાં આવશે. જ્યારે સરકારી શાળાના 2,000થી વધુ વિદ્યાર્થીઓને સ્કૂલ યુનિફોર્મનું વિતરણ કરવામાં આવશે.
જામનગર મહાનગરપાલિકાના વોર્ડ નં.-2 સ્થિત શાળા નં.32/50 ખાતે લાઇફ સંસ્થા દ્વારા અંદાજે રૂૂ.1.50 કરોડના ખર્ચે નિર્માણ થનાર શાળાના નવા બિલ્ડિંગનું ઈ-ખાતમુહૂર્ત કરવામાં આવશે.
આ ઉપરાંત લોઠીયા અને ઝાખર ખાતે અંદાજે રૂૂ.7 કરોડના ખર્ચે નિર્માણ થનાર માધ્યમિક શાળાના મકાનોનું પણ ઈ-ખાતમુહૂર્ત કરવામાં આવશે.
જામનગરના યુવાનોને રોજગારીની નવી તકો ઉપલબ્ધ કરાવવાના હેતુથી 1,5000થી વધુ યુવાનો માટે રોજગાર મેળાનું આયોજન કરવામાં આવ્યું છે. આ મેળામાં 45 થી વધુ કંપનીઓની ઉપસ્થિતિ રહેશે, જેના થકી યુવાનોને વિવિધ ક્ષેત્રોમાં રોજગારીની તકો પ્રાપ્ત થશે.
વોર્ડ નં.-2 ના મચ્છરનગર વિસ્તારમાં વીર મહારાણા પ્રતાપ લાઇબ્રેરી કમ રીડિંગ રૂૂમનું ઉદ્ઘાટન કરવામાં આવશે. તેમજ વોર્ડ નં.-4 માં પણ લાઇબ્રેરી કમ રીડિંગ રૂૂમનું ઈ-ખાતમુહૂર્ત કરવામાં આવશે.
કાલાવડ તાલુકામાં શાળા છોડી ગયેલા 300થી વધુ બાળકોને પુન: શાળામાં પ્રવેશ અપાવવાનો સંકલ્પ પણ લેવામાં આવ્યો છે.
પ્રાથમિક શાળાઓમાં લેવાતી વિવિધ સ્પર્ધાત્મક પરીક્ષાઓમાં ઉત્તમ કામગીરી કરનારા આચાર્યોનું સન્માન કરવામાં આવશે. સાથે જ જામનગર જિલ્લાના શ્રેષ્ઠ શિક્ષકો, 100 ટકા પરિણામ મેળવનાર સરકારી શાળાઓ તથા ધોરણ 10 અને 12ના તેજસ્વી વિદ્યાર્થીઓનું સન્માન કરી તેમની સિદ્ધિને બિરદાવવામાં આવશે.
જામનગર નગર પ્રાથમિક શિક્ષણ સમિતિની શાળાઓને 05 વોટર કુલર ભેટ આપવામાં આવશે. જામનગરના નેશનલ અને ઇન્ટરનેશનલ કક્ષાના રમતવીરોનું સન્માન કરી તેમની સિદ્ધિઓને બિરદાવવામાં આવશે તથા યુવા પેઢીને રમતગમત ક્ષેત્રે આગળ વધવા પ્રોત્સાહિત કરવામાં આવશે. યુનિટી-100 સંસ્થા અંતર્ગત 300 વિધવા બહેનોને કીટનું વિતરણ કરવામાં આવશે. આ ઉપરાંત 200 ગર્ભવતી બહેનોને પોષણયુક્ત આહારની કીટનું વિતરણ કરવામાં આવશે.
જામનગર ઉત્તર વિધાનસભા વિસ્તારમાં સંગઠન માટે કાર્યરત વોર્ડ પ્રમુખો, મહામંત્રીઓ, કોર્પોરેટરો તથા બુથ પ્રમુખોને રૂૂ.15 લાખના વીમા કવચનો લાભ અપાવવાનો સેવાકીય સંકલ્પ પણ લેવામાં આવ્યો છે.
પર્યાવરણ સંરક્ષણના સંદેશ સાથે જામનગર ઉત્તર વિધાનસભા વિસ્તારમાં 5 સપ્ટેમ્બરે જન્મેલા બાળકોની સંખ્યા જેટલા વૃક્ષોનું રોપણ કરવામાં આવશે. આ રીતે જન્મદિવસની ઉજવણીને પર્યાવરણ સંરક્ષણ અને સમાજસેવા સાથે જોડવાનો પ્રયાસ કરવામાં આવ્યો છે. આ ઉપરાંત સેવા રથ આપના દ્વારે-2.0 અંતર્ગત પણ વિવિધ સેવાકીય પ્રવૃત્તિઓ હાથ ધરવામાં આવશે.
રીવાબા જાડેજાના જન્મદિવસ નિમિત્તે યોજાનારા આ 21 સેવાકીય સંકલ્પોનો મુખ્ય હેતુ જન્મદિવસની ઉજવણીને માત્ર વ્યક્તિગત પ્રસંગ પૂરતી મર્યાદિત રાખવાને બદલે શિક્ષણ, રોજગાર, મહિલા કલ્યાણ, રમતગમત, પર્યાવરણ અને સમાજસેવાના ક્ષેત્રે લોકોના જીવનમાં સીધો સકારાત્મક બદલાવ લાવવાનો છે. સમગ્ર સેવાકીય અભિયાનથી આશરે 21,000થી વધુ લોકો પ્રત્યક્ષ કે પરોક્ષ રીતે લાભાન્વિત થશે.
