ઈન્ડિયન પ્રીમિયર લીગ (IPL) 2025ની શરૂઆત 22 માર્ચથી શરૂ થશે. આ દરમિયાન આરોગ્ય મંત્રાલયએ આઇપીએલ ચેરમેનને પત્ર લખ્યો છે. આરોગ્ય મંત્રાલય દ્વારા આઇપીએલ ચેરમેનને લખેલા પત્રમાં કહેવામાં આવ્યું છે કે IPL મેચો દરમિયાન તમાકુ અને દારૂની જાહેરાતો બતાવવામાં ન આવે.
પત્રમાં લખવામાં આવ્યું છે કે હાલમાં ભારતમાં ડાયાબિટીસ, ફેફસાના રોગો, કેન્સર જેવી ગંભીર બીમારીઓ ઝડપથી વધી રહી છે. તમાકુ અને આલ્કોહોલનું સેવન આ રોગોમાં વધારો થવાનું મુખ્ય કારણ છે. તમાકુના કારણે સૌથી વધુ મૃત્યુના મામલે ભારત બીજા ક્રમે આવે છે. ભારતમાં દર વર્ષે 14 લાખ લોકો દારૂના કારણે મૃત્યુ પામે છે. આ પહેલા સ્વાસ્થ્ય મંત્રાલયે પણ સ્પોર્ટ્સ ટુર્નામેન્ટ દરમિયાન દારૂ અને તમાકુના પ્રચાર પર પ્રતિબંધ લગાવવાની ભલામણ કરી હતી.
પત્રમાં લખેલા મુખ્ય મુદ્દાઓ
IPL મેચ દરમિયાન સ્ટેડિયમની અંદર અને બહાર બ્રોડકાસ્ટ પ્લેટફોર્મ પર તમાકુ અને દારૂની તમામ જાહેરાતો પર પ્રતિબંધ મૂકવો જોઈએ.
સ્ટેડિયમ અને IPL સ્થળોએ તમાકુ અને દારૂના વેચાણ પર પ્રતિબંધ.
યુવાનો માટે રોલ મોડલ હોવાને કારણે રમતગમતની દુનિયા સાથે જોડાયેલા લોકોએ દારૂ અને તમાકુની કંપનીઓને કોઈપણ રીતે પ્રોત્સાહન આપવું જોઈએ નહીં.
IPLમાં જાહેરાતોથી કરોડોની કમાણી
IPL વિશ્વની સૌથી મોટી T20 લીગ છે. ભારતમાં આ લીગનો ક્રેઝ ઘણો વધારે છે. દરેક મેચની ટિકિટ માટે ધસારો જોવા મળી રહ્યો છે. જોવાની દ્રષ્ટિએ પણ, દર વર્ષે પાછલા વર્ષની સરખામણીમાં વધુ દર્શકો નોંધાય છે. એક રિપોર્ટ અનુસાર, Jiostarએ IPL 2025 માટે 4,500 કરોડ રૂપિયાની આવકનું લક્ષ્ય નક્કી કર્યું છે. એવો અંદાજ છે કે તમામ 10 ટીમો સ્પોન્સરશિપની આવકમાં લગભગ 1300 કરોડ રૂપિયા કમાઈ શકે છે. IPL મેચ દરમિયાન તમાકુ વગેરેની જાહેરાતો પ્રત્યક્ષ કે પરોક્ષ રીતે બતાવવામાં આવે છે. યુવા પેઢી પર તેની ખરાબ અસર પડે છે. BCCI પણ આ જાહેરાતોથી ઘણી કમાણી કરે છે.
IPL 2025 22 માર્ચથી શરૂ થશે
IPLની આગામી સિઝન 22 માર્ચથી રમાશે. પ્રથમ મેચ ઈડન ગાર્ડનમાં કોલકાતા નાઈટ રાઈડર્સ અને રોયલ ચેલેન્જર્સ બેંગ્લોર વચ્ચે રમાશે. 2 મહિનાથી વધુ સમય સુધી ચાલનારી આ ટુર્નામેન્ટની ફાઇનલ મેચ 25 મેના રોજ રમાશે.