વિશ્વની બે સૌથી મોટી અર્થવ્યવસ્થા અમેરિકા અને ચીન વચ્ચે તણાવ વધી રહ્યો છે. સોમવારે અમેરિકાના રાષ્ટ્રપતિ ડોનાલ્ડ ટ્રમ્પે ચીન પર વધારાના 50 ટકા ટેરિફ લાદવાની ધમકી આપી હતી. ચીને પણ જવાબ આપતા કહ્યું છે કે જો અમેરિકા ચીની સામાન પર વધુ 50% ટેક્સ લાદશે તો તે બદલો લેશે. તેમણે કહ્યું કે ચીન પોતાના અધિકારો અને હિતોની રક્ષા માટે આવું કરશે. ચીનના વાણિજ્ય મંત્રાલયે એક નિવેદનમાં કહ્યું છે કે અમેરિકા દ્વારા ચીન પર કહેવાતા પારસ્પરિક ટેરિફ લાદવામાં આવે છે તે સંપૂર્ણપણે ખોટું છે. આ એકતરફી ગુંડાગીરી છે. ચીને આ પહેલા પણ વળતી ટેરિફ લગાવી છે.
મંત્રાલયે સંકેત આપ્યો હતો કે વધુ ટેરિફ લાદવામાં આવી શકે છે.ચીનના મંત્રાલયે કહ્યું કે ચીન દ્વારા લેવામાં આવેલા વળતા પગલાંનો હેતુ તેની સાર્વભૌમત્વ, સુરક્ષા અને વિકાસના હિતોની રક્ષા કરવાનો છે. ઉપરાંત, સામાન્ય આંતરરાષ્ટ્રીય વેપાર વ્યવસ્થા જાળવી રાખવી પડશે. આ સંપૂર્ણપણે ન્યાયી છે. ચીન પર ટેરિફ વધારવાની અમેરિકાની ધમકી એક બીજી ભૂલ છે. આ ફરી એકવાર અમેરિકાના બ્લેકમેઇલિંગની પ્રકૃતિને ઉજાગર કરે છે. ચીન આ ક્યારેય સ્વીકારશે નહીં. જો અમેરિકા મનસ્વી રીતે કામ કરશે તો ચીન અંત સુધી લડશે.