પ્લેટિનમના ભાવમાં થયેલા તોતિંગ વધારાને કારણે કાર્બોપ્લાટિન, ઓક્સાલીપ્લાટિન અને સિસ્પ્લાટિન જેવી કેન્સરની સારવારમાં વપરાતી દવાઓનું ઉત્પાદન હવે સ્થાનિક દવા ઉત્પાદકો માટે આર્થિક રીતે મુશ્કેલ બની ગયું છે.
આ સંકટને પહોંચી વળવા માટે સ્થાનિક દવા ઉત્પાદકોએ નેશનલ ફાર્માસ્યુટિકલ પ્રાઇસિંગ ઓથોરિટીનો સંપર્ક કર્યો છે અને દર્દીઓને વેચવામાં આવતી આ દવાઓની મહત્તમ કિંમતમાં 50% ના વધારાની માંગ કરી છે. પ્લેટિનમ આ દવાઓના સંયોજનોમાં એક મહત્વપૂર્ણ ઘટક છે, અને તેના ભાવમાં ઉછાળો ઉત્પાદકો માટે મોટી ચિંતાનો વિષય બન્યો છે.
હાલમાં 10 એમજી/એમએલ કાર્બોપ્લાટિન વાયલની મહત્તમ કિંમત 61.10 રૂૂપિયા છે. જ્યારે સિસ્પ્લાટિન માટે દવાની ક્ષમતાના આધારે કિંમત 70 થી 300 રૂપિયા સુધીની છે. સિપ્લા, ઇન્ટાસ, ડો. રેડ્ડીઝ લેબોરેટરીઝ, ઝાયડસ લાઇફસાયન્સિસ, એમક્યોર, ફ્રેસેનિયસ અને હેટરો જેવી ડઝનબંધ સ્થાનિક કંપનીઓ આ દવાઓ બનાવે છે. એક ઇન્ડસ્ટ્રી એક્ઝિક્યુટિવે ચેતવણી આપી છે કે જો સરકાર જાહેર હિતમાં હસ્તક્ષેપ નહીં કરે અને યોગ્ય પગલાં નહીં લે, તો કંપનીઓની નફાકારકતા અને કેન્સરની આ પ્રાથમિક સારવારની ઉપલબ્ધતા સામે મોટો ખતરો ઊભો થઈ શકે છે.
જોકે, ઉદ્યોગના નિષ્ણાતોનું કહેવું છે કે આ દવાઓની ઓછી કિંમત જ હવે એક મોટી સમસ્યા બની રહી છે. એડીસી (એન્ટીબોડી-ડ્રગ કોન્જ્યુગેટ્સ) અથવા ઈમ્યુનોથેરાપી કરતાં પ્લેટિનમ દવાઓ ઘણી સસ્તી હોવાથી, ઉત્પાદકોને તેના ઉત્પાદન માટે ઓછું નાણાકીય પ્રોત્સાહન મળે છે, જે એક ખતરનાક વિરોધાભાસ ઊભો કરે છે. 2013 થી આ પ્લેટિનમ આધારિત દવાઓ સરકારી ભાવ નિયંત્રણ હેઠળ છે. ઇન્ડસ્ટ્રીના આંતરિક સૂત્રોના જણાવ્યા અનુસાર, 2015 થી કાર્બોપ્લાટિનના ભાવમાં માત્ર 21.71% નો વધારો થયો છે.