સુપ્રીમ કોર્ટે સોહરાબુદ્દીન શેખ કથિત નકલી એન્કાઉન્ટર કેસમાં 21 પોલીસકર્મીઓ સહિત 22 આરોપીઓને નિર્દોષ છોડી મૂકવાના બોમ્બે હાઈકોર્ટના આદેશને પડકારતી અરજી પર સુનાવણી કરી હતી. સુનાવણી દરમિયાન, કોર્ટે સીબીઆઈ (CBI) અને નિર્દોષ છૂટેલા 22 વ્યક્તિઓને નોટિસ જારી કરી હતી. આ મામલે આગામી સુનાવણી 28 ઓક્ટોબરે નિર્ધારિત કરવામાં આવી છે. સોહરાબુદ્દીન શેખના ભાઈ રૂૂબાબુદ્દીન શેખે બોમ્બે હાઈકોર્ટના ચુકાદાને સુપ્રીમ કોર્ટમાં પડકાર્યો છે.
92 સાક્ષીઓ ફરી ગયા હોવાની બાબત અંગે સુપ્રીમ કોર્ટે મહત્વપૂર્ણ અવલોકન કર્યું હતું. મુખ્ય ન્યાયાધીશ એ જણાવ્યું હતું કે, તેઓ અમુક મુખ્ય સાક્ષીઓના નિવેદનો તપાસવા ઈચ્છે છે. સમગ્ર રેકોર્ડ મંગાવવામાં આવી રહ્યો નથી; તેના બદલે, સંબંધિત પક્ષે એવા 3-4 સાક્ષીઓના નિવેદનો રજૂ કરવા જોઈએ જેમને તેઓ સૌથી મહત્વપૂર્ણ માનતા હોય. કોર્ટ આરોપીઓને નિર્દોષ છોડી મૂકવાના નિર્ણયની તપાસ કરશે. જોકે, કોર્ટ આદેશના એક ચોક્કસ ભાગ એટલે કે પેરાગ્રામ 43 ની સમીક્ષા કરશે નહીં.
સુનાવણી દરમિયાન, જસ્ટિસ જોયમાલ્યા બાગચીએ 92 સાક્ષીઓ ફરી ગયા હોવાની બાબત પર ગંભીર ચિંતા વ્યક્ત કરી હતી. તેમણે ટિપ્પણી કરી હતી કે આ કેસમાં નિષ્પક્ષ અને ન્યાયી સુનાવણી થઈ હતી કે કેમ તે બાબત પણ વિચારવા જેવી છે. મુખ્ય ન્યાયાધીશે જણાવ્યું હતું કે કોર્ટ મર્યાદિત રેકોર્ડના આધારે કેસના મુખ્ય પાસાઓની તપાસ કરશે અને તમામ દસ્તાવેજો મંગાવવાને બદલે આવશ્યક સાક્ષીઓના નિવેદનો પર ધ્યાન કેન્દ્રિત કરશે.
7 મે, 2019ના રોજ, બોમ્બે હાઈકોર્ટે નીચલી કોર્ટના ચુકાદાને યથાવત રાખ્યો હતો. હાઈકોર્ટે નીચલી કોર્ટ દ્વારા તમામ 22 આરોપીઓને નિર્દોષ છોડી મૂકવાના નિર્ણયને માન્ય રાખ્યો હતો. એવો આરોપ છે કે 2005માં ગેંગસ્ટર સોહરાબુદ્દીન શેખ અને તેમની પત્ની કૌસર બીની પોલીસે એક બનાવટી એન્કાઉન્ટરમાં હત્યા કરી હતી. પુરાવાના અભાવે સીબીઆઈ કોર્ટે ડિસેમ્બર 2018માં આરોપીઓને નિર્દોષ છોડી મૂક્યા હતા. હાઈકોર્ટે તેના ચુકાદામાં જણાવ્યું હતું કે, સોહરાબુદ્દીન શેખ અને કૌસર બીનું ગુજરાત અને રાજસ્થાન પોલીસ દ્વારા અપહરણ કરવામાં આવ્યું હતું તે સાબિત કરવામાં સરકારી પક્ષ નિષ્ફળ રહ્યો હતો; તેમજ બનાવટી એન્કાઉન્ટરના કથિત કાવતરા પાછળનો હેતુ પણ તે સ્થાપિત કરી શક્યો ન હતો.
હાઈકોર્ટે જણાવ્યું હતું કે, સરકારી પક્ષના 92 સાક્ષીઓ ફરી ગયા હોવાનો અર્થ એવો નથી કે ટ્રાયલ યોગ્ય રીતે ચલાવવામાં આવી ન હતી. આરોપીઓને નિર્દોષ જાહેર કરતી વખતે, વિશેષ ટ્રાયલ કોર્ટે જણાવ્યું હતું કે સરકારી પક્ષ એવો કોઈ નક્કર કેસ રજૂ કરવામાં નિષ્ફળ રહ્યો હતો જેનાથી એવું સૂચિત થાય કે સોહરાબુદ્દીન અને અન્યની હત્યા માટે કોઈ કાવતરું ઘડવામાં આવ્યું હતું અને તેમાં હાલના આરોપીઓની કોઈ ભૂમિકા હતી. એપ્રિલ 2019માં, શેખના ભાઈઓએ હાઈકોર્ટમાં અપીલ દાખલ કરી હતી.
