ગુજરાત સરકારના વહીવટી માળખામાં શિસ્ત અને એકરૂૂપતા લાવવા માટે સામાન્ય વહીવટી વિભાગ (GAD) દ્વારા એક મહત્વપૂર્ણ નિર્ણય લેવામાં આવ્યો છે. રાજ્ય સરકારના વિવિધ વિભાગોમાં ફરજ બજાવતા ડ્રાઈવરોના યુનિફોર્મનો વર્ષો જૂનો કલર હવે બદલી નાખવામાં આવ્યો છે. નવા નિયમ મુજબ હવે તમામ સરકારી વાહનચાલકોએ નવા ડ્રેસ કોડનું પાલન કરવું પડશે.
અત્યાર સુધી સરકારી ડ્રાઈવરો સ્ટીલ ગ્રે રંગના શર્ટ અને લાઈટ ગ્રે રંગના પેન્ટમાં જોવા મળતા હતા, પરંતુ હવે આ જૂના રંગને વિદાય આપી દેવામાં આવી છે. સામાન્ય વહીવટી વિભાગના નવા પરિપત્ર મુજબ, હવે ડ્રાઈવરો માટે આછો બદામી રંગનો શર્ટ અને ઘાટો બદામી રંગનું પેન્ટ નવો ગણવેશ તરીકે નક્કી કરવામાં આવ્યો છે.
વિભાગના ઉચ્ચ અધિકારીઓના જણાવ્યા અનુસાર, આ ફેરફાર પાછળ મુખ્યત્વે બે ઉદ્દેશ્ય રહેલા છે, જેમાં ડ્રાઈવરોની ઓળખ વધુ સ્પષ્ટ અને વ્યવસ્થિત રીતે થઈ શકે તે મુખ્ય છે. આ ઉપરાંત, તમામ સરકારી વિભાગોમાં વાહનચાલકોની એક સમાન અને વ્યવસાયિક છબી ઊભી થાય તેવો લક્ષ્યાંક પણ રાખવામાં આવ્યો છે. આ નવા બદલાવથી સરકારી કચેરીઓમાં આવતા મુલાકાતીઓ અને અધિકારીઓ માટે ડ્રાઈવરોને અલગથી ઓળખવામાં ઘણી સરળતા રહેશે.
સામાન્ય વહીવટી વિભાગે આ અંગે સંબંધિત તમામ વિભાગોને કડક સૂચના આપી દીધી છે. આગામી સમયમાં તબક્કાવાર રીતે જૂના યુનિફોર્મની જગ્યાએ આ નવો ડ્રેસ કોડ અમલી બનાવવામાં આવશે. તમામ સરકારી વાહનચાલકો માટે આ નવા રંગના યુનિફોર્મનું પાલન કરવું હવેથી ફરજિયાત રહેશે.