લાખો ઘરોમાં વીજળી ગુલ, ખાનગી વિમાન ક્રેશ થવાથી 7 લોકોના મોત
યુએસમાં બરફનું તોફાન હજુ પણ તબાહી મચાવી રહ્યું છે. અત્યાર સુધીમાં 30 લોકોના મોત થયા છે. લાખો લોકો પોતાના ઘરોમાં વીજળી વગર રહી રહ્યા છે, જેના કારણે તેઓ અંધારામાં જીવી રહ્યા છે. તોફાનના કારણે વિમાન ક્રેશ થતા 7 લોકોના મોત થયા હતા. હિમવર્ષાને કારણે વ્યાપક વિક્ષેપ પડ્યો છે. કુદરતી આફતને કારણે વ્યાપક વીજળી ગુલ થઈ ગઈ છે અને ફ્લાઇટ રદ કરવામાં આવી છે. ટેક્સાસથી ન્યૂ ઇંગ્લેન્ડ સુધી દેશના મોટા ભાગોમાં ભારે હિમવર્ષા થઈ છે.
આ દરમિયાન, યુએસએના મૈનેમાં બાંગોર ઇન્ટરનેશનલ એરપોર્ટ પર એક ખાનગી બિઝનેસ જેટ ક્રેશ થતાં સાત લોકોએ જીવ ગુમાવ્યા. આ અકસ્માત અમેરિકાના ઘણા ભાગોમાં ભારે બરફના તોફાન વચ્ચે થયો હતો જે સતત તબાહી મચાવી રહ્યો છે. અકસ્માત બાદ બાંગોર ઇન્ટરનેશનલ એરપોર્ટને અસ્થાયી રૂૂપે બંધ કરવામાં આવ્યું હતું.
ટેનેસી, મિસિસિપી અને લ્યુઇસિયાના બરફના તોફાનથી સૌથી વધુ પ્રભાવિત છે. ટેક્સાસ, કેન્ટુકી, જ્યોર્જિયા, વેસ્ટ વર્જિનિયા અને અલાબામા ખાસ કરીને પ્રભાવિત છે. ફ્લાઇટ ટ્રેકિંગ વેબસાઇટ ફ્લાઇટઅવેર અનુસાર, રવિવારે નિર્ધારિત 10,800 થી વધુ યુએસ ફ્લાઇટ્સ રદ કરવામાં આવી હતી. શનિવારે પણ 4,000 થી વધુ ફ્લાઇટ્સ રદ કરવામાં આવી હતી.
હોમલેન્ડ સિક્યુરિટી વિભાગ અનુસાર, 17 રાજ્યો અને વોશિંગ્ટન, ડી.સી.માં હવામાન કટોકટી જાહેર કરવામાં આવી હતી. ઉર્જા વિભાગ (DOE) એ ટેક્સાસમાં બ્લેકઆઉટ અટકાવવા માટે કટોકટીનો આદેશ જારી કર્યો હતો, જેનાથી ડેટા સેન્ટરો અને અન્ય મોટી સંસ્થાઓ બેકઅપ પાવર સંસાધનોનો ઉપયોગ કરી શકે છે.