ગુજરાત સરકારના શ્રમ અને રોજગાર વિભાગ દ્વારા રાજ્યમાં સંગઠિત અને અસંગઠિત ક્ષેત્રના શ્રમિકોની સુરક્ષા તેમજ પારદર્શિતા વધારવા માટે મહત્વપૂર્ણ પગલું ભરવામાં આવ્યું છે.
રાજ્ય સરકારે બહાર પાડેલા નવા જાહેરનામા અનુસાર, હવેથી 10 કે તેથી વધુ કામદારો ધરાવતી તમામ દુકાનો, વાણિજ્યિક સંસ્થાઓ (કોમર્શિયલ એસ્ટાબ્લિશમેન્ટ્સ), રેસ્ટોરન્ટ્સ અને નાના વ્યવસાયિક એકમો માટે નિયત સરકારી પોર્ટલ પર ફરજિયાત ઓનલાઇન રજિસ્ટ્રેશન કરાવવું અનિવાર્ય બનશે. અગાઉ માત્ર મોટા ઔદ્યોગિક એકમો કે ફેક્ટરીઓ પૂરતી સીમિત રહેતી નિયમનકારી પ્રક્રિયાનો વ્યાપ વધારીને હવે મધ્યમ અને નાના કદના તમામ એકમોને આ ડિજિટલ માળખા હેઠળ આવરી લેવામાં આવ્યા છે.
શ્રમ વિભાગના અધિકારીઓના જણાવ્યા અનુસાર, આ નવી વ્યવસ્થાનો મુખ્ય ઉદ્દેશ્ય કામદારોના કલ્યાણકારી અધિકારોનું રક્ષણ કરવાનો અને રોજગાર ડેટાબેઝને અધ્યતન બનાવવાનો છે. ઓનલાઇન પોર્ટલ પર નોંધણી થવાથી સંસ્થાઓમાં ફરજ બજાવતા શ્રમિકોને મળવાપાત્ર લઘુતમ વેતન, પ્રોવિડન્ટ ફંડ (PF), એમ્પ્લોઇઝ સ્ટેટ ઇન્સ્યોરન્સ (ESI), નિયત કામના કલાકો અને ઓવરટાઇમ ભથ્થા જેવી સુવિધાઓ પર નજર રાખવી સરળ બનશે. વધુમાં, કોઈપણ દુર્ઘટના કે વિવાદના સમયે કામદાર અને માલિક બંને પક્ષે સત્તાવાર પુરાવા ઉપલબ્ધ રહેશે, જેથી સરકારી યોજનાઓ અને સામાજિક સુરક્ષા લાભો સીધા જ હકદાર શ્રમિક સુધી પહોંચાડી શકાશે.
વેપારીઓ અને એકમ સંચાલકો માટે આખી પ્રક્રિયા અત્યંત સરળ, પારદર્શક અને પેપરલેસ રાખવામાં આવી છે, જેથી કચેરીઓના ધક્કા ખાવામાંથી મુક્તિ મળશે અને ’ઈઝ ઓફ ડુઈંગ બિઝનેસ’ને પ્રોત્સાહન મળશે.
વ્યવસાયિકોએ નિયત સમયમર્યાદામાં પોર્ટલ પર પોતાના યુનિટની વિગતો, સ્ટાફની સંખ્યા અને વ્યવસાયના પ્રકારની માહિતી અપલોડ કરીને ડિજિટલ પ્રમાણપત્ર મેળવવાનું રહેશે. તંત્ર દ્વારા સ્પષ્ટતા કરવામાં આવી છે કે નિર્ધારિત સમયમાં પ્રક્રિયા પૂર્ણ ન કરનાર કે નિયમોનું ઉલ્લંઘન કરનાર એકમો સામે શ્રમ કાયદા હેઠળ દંડ સહિતની કાયદાકીય કાર્યવાહી કરવામાં આવશે.
