સ્વઘોષિત યુદ્ધ વિરામ છતાં અમેરિકા ફરી ઇઝરાયેલ સાથે હુમલાઓમાં જોડાયું: તમામ મશીનરી, યુરેનિયમ સ્વાહા
અખાતી યુધ્ધ વચ્ચે દુનિયા હવે ફરીથી અધ્ધરજીવ થઇ ગઇ છે. અમેરિકી રાષ્ટ્રપ્રમુખ ડોનાલ્ડ ટ્રમ્પે આગામી તા.6 એપ્રિલની રાત્રી સુધી સ્વઘોષિત યુધ્ધ વિરામ જાહેર કર્યું હોવા છતાં આજે અમેરિકા, ઇઝરાયેલ સાથે મળીને ફરી યુધ્ધમાં સક્રિય થતા મધ્યપુર્વમાં સન્નાટો મચી ગયો છે અને ઇરાનના પરમાણું પ્લાન્ટ પરના ભીષણ હુમલામાં ઇઝરાયેલ સાથે મળીને અમેરિકાએ દસથી વધુ બોમ્બ ઝીંકી વિનાશ વેર્યો છે. ટ્રમ્પની નવી નીતિ મુખ મેં રામ બગલ મેં છુરી જેવી છે.
મધ્ય પૂર્વમાં ચાલી રહેલો સંઘર્ષ હવે ચરમસીમાએ પહોંચ્યો છે. ઈરાનના સરકારી મીડિયાના દાવા મુજબ, ઈરાનના અત્યંત સંવેદનશીલ ગણાતા ખૌંદાબ ન્યુક્લિયર પાવર પ્લાન્ટ પર અમેરિકા અને ઇઝરાયલ દ્વારા મોટો હુમલો કરવામાં આવ્યો છે. આ હુમલામાં હેવી-વોટર રિએક્ટર અને યલોકેક પ્રોડક્શન પ્લાન્ટને નિશાન બનાવવામાં આવ્યા છે.
આ હુમલામાં પાવન પ્લાન્ટના મુખ્ય આધારરૂપ મશિનરીનો વિનાશ થઇ ગયો છે.
ઈરાનના અત્યંત સંવેદનશીલ ગણાતા ’ખૌંદાબ’ ન્યુક્લિયર પ્લાન્ટ પર ભીષણ હુમલો કરવામાં આવ્યો છે. અમેરિકા અને ઇઝરાયલ દ્વારા કરવામાં આવેલા આ હુમલામાં હેવી-વોટર રિએક્ટરને મુખ્ય નિશાન બનાવવામાં આવ્યું છે. આ હુમલામાં પરમાણુ બોમ્બ બનાવવા માટે વપરાતા ’યલોકેક’ પ્રોડક્શન પ્લાન્ટ પર 10 થી વધુ બોમ્બ ઝીંકવામાં આવ્યા છે. હુમલા બાદ પ્લાન્ટની આસપાસ કાળો ધુમાડો જોવા મળ્યો હતો, જોકે રેડિયેશનના કોઈ સંકેત મળ્યા નથી.
હુમલા બાદ ઈરાનની સૈન્ય પાંખ IRGC એ વળતો પ્રહાર કરવાની જાહેરાત કરી છે. ઈરાને અમેરિકા અને ઇઝરાયલ સાથે જોડાયેલા ઉદ્યોગોમાં કામ કરતા કર્મચારીઓને તાત્કાલિક ઓફિસ છોડી દેવા માટે અલ્ટીમેટમ આપ્યું છે. અમેરિકન પ્રમુખ ડોનાલ્ડ ટ્રમ્પે અગાઉ 10 દિવસ માટે હુમલા રોકવાની (સીઝફાયર) વાત કરી હતી, પરંતુ આ જાહેરાત વચ્ચે જ પરમાણુ પ્લાન્ટ પર થયેલા હુમલાએ સમગ્ર વિશ્વમાં આશ્ચર્ય અને તણાવ વધારી દીધો છે.
વળતા હુમલાની ભીતિને પગલે ઈરાને ઔદ્યોગિક વિસ્તારોની 1 કિમીની ત્રિજ્યામાં રહેતા નાગરિકોને ઘર ખાલી કરવા આદેશ આપ્યો છે. મધ્ય પૂર્વમાં હવે ગમે ત્યારે મોટું યુદ્ધ ફાટી નીકળે તેવી સ્થિતિ સર્જાઈ છે.