પશ્ચિમ બંગાળના કોલકાતામાં મોટી ટ્રેન દુર્ઘટના, સિકંદરાબાદ-શાલીમાર એક્સપ્રેસના ચાર ડબ્બા પાટા પરથી ઉતર્યા, અનેક મુસાફરો ઘાયલ

પશ્ચિમ બંગાળના કોલકાતાના નાલપુરમાં આજે સવારે રેલ અકસ્માતની ઘટના સામે આવી છે. સિકંદરાબાદથી શાલીમાર જતી એક્સપ્રેસ ટ્રેનના ચાર ડબ્બા પાટા પરથી ઉતરી ગયા હતા. આ અકસ્માતમાં કેટલાક મુસાફરો ઘાયલ થયા છે. માહિતી મળતા જ રેલ્વે અધિકારીઓ અને રેસ્ક્યુ ટીમ આવી પહોંચી હતી. આ અકસ્માત સવારે સાડા છ વાગ્યાની આસપાસ બન્યો હતો.

આ ટ્રેન અકસ્માત હાવડા-ખડગપુર રેલવે રૂટ પર થયો હતો. અકસ્માતમાં પાટા પરથી ઉતરેલા ચાર કોચ પૈકી એક પાર્સલ વાન પણ હતી. અકસ્માતને પગલે ઘટનાસ્થળે અફરા-તફરીનો માહોલ સર્જાયો હતો. મુસાફરોના જણાવ્યા અનુસાર ટ્રેનની સ્પીડ સામાન્ય કરતા ઓછી હતી. અચાનક જોરદાર આંચકો અનુભવાયો. સીટની ઉપર રાખેલી વસ્તુઓ નીચે પડી હતી. ડ્રાઈવરે તરત જ ટ્રેન રોકી. જ્યારે કેટલાક મુસાફરો ટ્રેનમાંથી નીચે ઉતર્યા ત્યારે તેઓએ જોયું કે ચાર ડબ્બા પાટા પરથી ઉતરી ગયા હતા.

એક અધિકારીએ જણાવ્યું કે તમામ મુસાફરોને 22850 સિકંદરાબાદ-શાલીમાર એક્સપ્રેસ ટ્રેનમાંથી સુરક્ષિત રીતે ઉતારવામાં આવ્યા છે. આ અકસ્માતમાં કેટલાક મુસાફરોને સામાન્ય ઈજાઓ થઈ છે. તેને સારવાર માટે હોસ્પિટલમાં મોકલવામાં આવ્યો છે. પાટા પરથી ઉતરેલા કોચને પણ ખાસ નુકસાન થયું નથી. રેલ્વે સુરક્ષા દળ અને સ્થાનિક પોલીસ પણ ઘટના સ્થળે પહોંચી ગઈ છે. બચાવ કાર્ય ચાલુ છે. અકસ્માત અંગે મુસાફરો પાસેથી પણ માહિતી લેવામાં આવી રહી છે.

અધિકારીઓના જણાવ્યા અનુસાર આ અકસ્માતની તપાસ કરવામાં આવશે. ટ્રેનના ટ્રેકમાં કોઈ સમસ્યા હતી કે પછી ડ્રાઈવરની કોઈ ભૂલને કારણે આ અકસ્માત થયો છે કે કેમ તેની તપાસ કરવામાં આવશે. ટ્રેનમાં કોઈ ટેકનિકલ ખામી હતી કે કેમ તેની પણ તપાસ કરવામાં આવી રહી છે. ટ્રેનમાં મુસાફરી કરતા મુસાફરો માટે આગળની મુસાફરી માટે વૈકલ્પિક વ્યવસ્થા પર પણ વિચાર કરવામાં આવી રહ્યો છે.

આ દુર્ઘટના બાદ હાવડા-ખડગપુર રેલવે રૂટ પર ટ્રેનોની અવરજવર બંધ કરી દેવામાં આવી છે. એક અધિકારીએ જણાવ્યું કે જ્યાં સુધી ટ્રેનની બોગીને પાટા પર લાવવામાં ન આવે ત્યાં સુધી આ રૂટ પરથી પસાર થતી ટ્રેનોને અન્ય રૂટ પર ડાયવર્ટ કરવામાં આવી છે. ટૂંક સમયમાં જ આ રૂટ પરથી પણ ટ્રેનો ચલાવવામાં આવશે.