ઓગસ્ટ મહિનાના પ્રારંભ બાદ શાંત પડેલા મૌસમી પવનો વચ્ચે ગુજરાતમાં ફરી એકવાર વરસાદી માહોલ જામવાની શક્યતાઓ સેવાઈ રહી છે. ભારતીય હવામાન વિભાગની તાજેતરની આગાહી મુજબ, 11 ઓગસ્ટથી 14 ઓગસ્ટ દરમિયાન રાજ્યના વિવિધ વિસ્તારોમાં ફરી એકવાર વરસાદી રાઉન્ડ શરૂૂ થઈ શકે છે. બંગાળની ખાડીમાં સર્જાયેલી નવી લો-પ્રેશર સિસ્ટમના કારણે રાજ્યના હવામાનમાં આ પલટો જોવા મળશે. હવામાન નિષ્ણાતોના જણાવ્યા અનુસાર, 10 ઓગસ્ટની મોડી રાતથી જ રાજ્યના વાતાવરણમાં ફેરફાર થવાની અને કેટલાક વિસ્તારોમાં ગાજવીજ સાથે વરસાદ શરૂૂ થવાની પૂરેપૂરી સંભાવના છે.
હવામાન વિજ્ઞાન કેન્દ્રના જણાવ્યા અનુસાર, બંગાળની ખાડીમાં વાતાવરણીય ચક્રવાત અને લો-પ્રેશર એરિયા સક્રિય થયો છે, જે પશ્ચિમ તરફ આગળ વધી રહ્યો છે. આ સિસ્ટમની સીધી અસર હેઠળ ઉત્તર ગુજરાત, મધ્ય ગુજરાત, પૂર્વ ગુજરાત અને દક્ષિણ ગુજરાતના અનેક વિસ્તારોમાં 11 થી 14 ઓગસ્ટ દરમિયાન હળવાથી મધ્યમ વરસાદી ઝાપટાં પડે તેવી સંભાવના છે. જોકે, આ દરમિયાન સમગ્ર રાજ્યમાં એકસાથે ભારેથી અતિભારે કે સાર્વત્રિક પૂર જેવો વરસાદ પડે તેવી કોઈ મોટી શક્યતા નથી, પરંતુ વાદળછાયા વાતાવરણ સાથે વાતાવરણમાં ભેજ અને ઠંડક વધશે.
આગામી ચાર દિવસ દરમિયાન રાજ્યના ઉત્તર, મધ્ય અને દક્ષિણ ભાગના કૂલ 19 જેટલા જિલ્લાઓમાં મેઘમહેર જોવા મળી શકે છે. તેમાં બનાસકાંઠા, વાવ-થરાદ, અલ્હાબાદ અથવા અરવલ્લી, મહેસાણા, સાબરકાંઠા, પાટણ, ગાંધીનગર, અમદાવાદ, ખેડા, આણંદ, મહીસાગર, વડોદરા, છોટાઉદેપુર, ભરૂૂચ, સુરત, તાપી, નવસારી, વલસાડ અને ડાંગ જિલ્લાનો સમાવેશ થાય છે.
ખાસ કરીને ઉત્તર ગુજરાત અને પૂર્વ પટ્ટાના જિલ્લાઓમાં વરસાદનું જોર અન્ય વિસ્તારોની સરખામણીએ વધુ રહેવાની શક્યતા વ્યક્ત કરવામાં આવી છે. આ વિસ્તારોમાં કેટલાક સ્થળે મેઘગર્જના અને વિજળીના ચમકારા સાથે ટૂંકા ગાળાનો મધ્યમથી ભારે વરસાદ પડી શકે છે.
ગુજરાત રિજયનની સરખામણીમાં સૌરાષ્ટ્ર અને કચ્છ પંથકમાં આ વાતાવરણીય સિસ્ટમની અસર પ્રમાણમાં ઓછી જોવા મળશે. આ વિસ્તારોમાં મુખ્યત્વે વાદળછાયું વાતાવરણ જળવાઈ રહેશે અને માત્ર છૂટાછવાયા સ્થળોએ હળવા ઝાપટાં જ પડી શકે છે. જોકે, સૌરાષ્ટ્રના દરિયાકાંઠાના કેટલાક વિસ્તારોમાં વાતાવરણમાં પલટો આવવાથી સ્થાનિક સ્તરે સારો વરસાદ વરસી શકે છે. પરંતુ સમગ્ર સૌરાષ્ટ્ર અને કચ્છ પ્રદેશમાં વ્યાપક કે ભારે વરસાદની શક્યતા હાલ પૂરતી નહિવત બતાવવામાં આવી છે.
