મિડલ ઇસ્ટમાં ચાલી રહેલા યુદ્ધ વચ્ચે ડોનાલ્ડ ટ્રમ્પે એક મોટો દાવો કર્યો હતો. ઓવલ ઓફિસમાં પત્રકારો સાથે વાત કરતા ટ્રમ્પે દાવો કર્યો છે કે ઈરાન હવે અમેરિકા સાથે કરાર કરવા માટે આતુર છે અને તેણે ભવિષ્યમાં ક્યારેય પણ પરમાણુ હથિયાર ન રાખવાની તૈયારી દર્શાવી છે. વધુમાં ટ્રમ્પે જણાવ્યું હતું કે યુનાઇટેડ સ્ટેટ્સે ઈરાન સામે યુદ્ધ જીતી લીધું છે અને ત્રણ અઠવાડિયાથી ચાલી રહેલા સંઘર્ષમાં વિજય જાહેર કર્યો છે.
તેમણે એ પણ ખુલાસો કર્યો હતો કે ઈરાને યુનાઇટેડ સ્ટેટ્સને તેલ અને ગેસ સંબંધિત એક મહત્વપૂર્ણ ભેટ આપી છે, ખાસ કરીને હોર્મુઝ સ્ટ્રેટ સંબંધિત.
મંગળવારે ઓવલ ઓફિસમાં પત્રકારો સાથે વાત કરતા, ટ્રમ્પે ટિપ્પણી કરી હતી કે ઈરાન હવે અમેરિકા સાથે કરાર કરવા માટે આતુર છે . તેમણે સંકેત આપ્યો હતો કે ઉપરાષ્ટ્રપતિ જેડી વાન્સ, રાજ્ય સચિવ માર્કો રુબિયો, મધ્ય પૂર્વ માટે ખાસ દૂત સ્ટીવ વિટકોફ અને તેમના જમાઈ જેરેડ કુશનર વાટાઘાટોનું નેતૃત્વ કરી રહ્યા છે. ટ્રમ્પે રહસ્યમય રીતે જણાવ્યું કે ઈરાની નેતૃત્વએ અમેરિકાને એક ‘મોટી ભેટ’ મોકલી છે, જેની કિંમત ઘણી વધારે છે. આ ભેટ હોર્મુઝની સામુદ્રધુની (Strait of Hormuz) અને તેલ પુરવઠા સાથે જોડાયેલી છે. ટ્રમ્પે સ્પષ્ટતા કરી કે, “તે કોઈ પરમાણુ હથિયાર નથી, પરંતુ તે તેલ અને ગેસ સાથે જોડાયેલી અત્યંત મહત્વની બાબત છે. આ ભેટ પરથી સાબિત થાય છે કે અમે યોગ્ય લોકો સાથે વાતચીત કરી રહ્યા છીએ.”
પોતાની લાક્ષણિક શૈલીમાં ટ્રમ્પે દાવો કર્યો કે અમેરિકાએ ઈરાન સામેનો જંગ જીતી લીધો છે. તેમણે કહ્યું કે ઈરાન પાસે હવે અમેરિકાના વિમાનોને રોકવાની કોઈ ક્ષમતા રહી નથી અને તેહરાન પર અમેરિકાના વિમાનો સતત ઉડી રહ્યા છે.