પંજાબી ગાયક અને અભિનેતા ગુરુ રંધાવા સાથે જોડાયેલા એક મોટા સમાચાર સામે આવ્યા છે. દિલ્હીના પશ્ચિમ વિહાર વિસ્તારમાં આવેલા તેમના ’24 એચએસ ફિટનેસ જીમ’ (24 HS Fitness Gym) પર અજાણ્યા શખ્સોએ ગોળીબાર કર્યો હતો. પ્રારંભિક અહેવાલો અનુસાર, બદમાશોએ જીમને નિશાન બનાવીને લગભગ સાત રાઉન્ડ ગોળીબાર કર્યો હતો અને ત્યારબાદ ઘટનાસ્થળેથી ફરાર થઈ ગયા હતા.
આ ઘટના બુધવારે મોડી રાત્રે બની હતી.આ ઘાતકી હુમલાને કારણે જીમના આગળના ભાગના કાચ તૂટી ગયા હતા. ફાયરિંગના કારણે આસપાસના લોકોમાં ભારે અફરાતફરી અને ભયનો માહોલ ફેલાઈ ગયો હતો. આં ઘટનાની જાણ થતાં જ પોલીસ ટીમો તાત્કાલિક ઘટનાસ્થળે પહોંચી હતી અને તપાસ શરૂ કરી છે. લોરેન્સ બિશ્નોઈ જૂથના સહયોગી અનિલ પંડિત ‘યુએસએ’ એ ઓડિયો નોટ અને ફેસબુક પોસ્ટ દ્વારા ગોળીબારની જવાબદારી સ્વીકારી હતી.
વાયરલ ઓડિયોમાં કથિત રીતે અનિલ પંડિત એવું કહેતો સંભળાય છે કે, ગુરુ રંધાવા પર આ હુમલો એટલા માટે કરવામાં આવ્યો કારણ કે તેમની બોલિવૂડ અભિનેતા સલમાન ખાન સાથે નિકટતા વધી રહી છે, અને સલમાન ખાન બિશ્નોઈ ગેંગનો દુશ્મન છે.
પોલીસ હાલમાં ગોળીબારની ઘટના અંગે જીમના માલિક પાસેથી માહિતી એકઠી કરી રહી છે. નજીકના સીસીટીવી કેમેરાના ફૂટેજની પણ તપાસ કરવામાં આવી રહી છે. અધિકારીઓ ગુનેગારોને ઓળખવાનો અને હુમલા પાછળનો હેતુ નક્કી કરવાનો પ્રયાસ કરી રહ્યા છે.
લોરેન્સ બિશ્નોઈ સલમાન ખાનને નિશાન બનાવી રહ્યા છે. કાળા હરણ શિકાર કેસમાં લોરેન્સ બિશ્નોઈ ગેંગ લાંબા સમયથી સલમાન ખાનનો પીછો કરી રહી છે. અભિનેતાને અનેક વખત જાનથી મારી નાખવાની ધમકીઓ મળી છે, અને તેમના ઘરની બહાર ગોળીબાર પણ કરવામાં આવ્યો છે. પરિણામે, તેમની સુરક્ષા વધારી દેવામાં આવી હતી, અને હવે તેઓ ક્યારેય સુરક્ષા વિના જોવા મળતા નથી. જો કે, આ વચ્ચે, સલમાન ખાનના નજીકના લોકો પર હુમલા થઈ રહ્યા છે.
