ગુજરાતના શિક્ષણ મંત્રી પ્રફુલ પાનસેરિયાના નામે બોગસ ફેસબુક એકાઉન્ટ બનાવવાની ઘટનાએ રાજ્યમાં ખળભળાટ મચાવી દીધો છે. આ ઘટનાએ સાયબર સુરક્ષા અને રાજકીય વ્યક્તિત્વોની ઓળખના દુરુપયોગના મુદ્દાને ફરી એકવાર ચર્ચામાં લાવ્યો છે. મંત્રી પાનસેરિયાએ જણાવ્યું કે તેમને તેમના સ્ટાફ અને નજીકના સંપર્કો તરફથી આ બનાવની જાણ થઈ, જ્યારે આ બોગસ એકાઉન્ટમાંથી શંકાસ્પદ મેસેજ અને લિંક્સ મોકલવામાં આવી રહ્યા હતા.
પ્રફુલ પાનસેરિયાએ તાત્કાલિક પોલીસને આ અંગે ફરિયાદ નોંધાવી છે, અને સાયબર ક્રાઇમ સેલે તપાસ હાથ ધરી છે. પોલીસ સૂત્રોના જણાવ્યા મુજબ, આ એકાઉન્ટનો ઉપયોગ લોકોને છેતરવા અને ખોટી માહિતી ફેલાવવા માટે કરવામાં આવ્યો હોવાની શંકા છે. મંત્રીએ નાગરિકોને અપીલ કરી છે કે તેઓ આવા કોઈપણ સંદેશાઓ પર વિશ્વાસ ન કરે અને સત્તાવાર સંપર્ક દ્વારા જ તેમની સાથે વાતચીત કરે. આ ઘટનાએ સોશિયલ મીડિયા પર સુરક્ષાના મુદ્દાઓને ઉજાગર કર્યા છે. સાયબર નિષ્ણાતોનું કહેવું છે કે જાહેર વ્યક્તિઓની ઓળખનો દુરુપયોગ રોકવા માટે કડક પગલાં લેવા જરૂૂરી છે. પોલીસે લોકોને સાવધાન રહેવા અને આવા બનાવોની તુરંત જાણ કરવા જણાવ્યું છે.