રાજધાની દિલ્હીના બવાના વિસ્તારમાં આજે વહેલી સવારે મોટી પોલીસ કાર્યવાહી જોવા મળી હતી, જ્યાં સ્પેશિયલ સેલ ટીમ અને ગુનેગારો વચ્ચે ભીષણ એન્કાઉન્ટર થયું હતું. કુખ્યાત રાજેશ બાવાનિયા ગેંગના સભ્ય અંકિત માનને એન્કાઉન્ટરમાં ગોળી વાગી હતી અને તે ઘાયલ થયો હતો. પોલીસે તેને તાત્કાલિક હોસ્પિટલમાં ખસેડ્યો, જ્યાં તેની હાલત સ્થિર હોવાનું જાણવા મળ્યું છે. વધુમાં, ગાઝીપુર વિસ્તારમાં પોલીસ અને ગુનેગારો વચ્ચે એન્કાઉન્ટર થયું. પોલીસે બે ગુનેગારોની ધરપકડ કરી.
પોલીસને ગુપ્ત માહિતી મળી હતી કે રાજેશ બાવાનિયા ગેંગના કેટલાક સભ્યો બવાના વિસ્તારમાં સક્રિય છે અને કોઈ મોટો ગુનો કરવાની યોજના બનાવી રહ્યા છે. સ્પેશિયલ સેલની ટીમે વિસ્તારને ઘેરી લીધો હતો. શંકાસ્પદોએ પોલીસને જોતા જ તેઓએ ગોળીબાર શરૂૂ કર્યો. જવાબમાં પોલીસે પણ ગોળીબાર કર્યો, જેમાં અંકિત માન ઘાયલ થયો. આ ઉપરાંત, પૂર્વ દિલ્હીના ગાઝીપુર વિસ્તારમાં પોલીસ એન્કાઉન્ટરમાં બે વોન્ટેડ ગુનેગારો, અમીન (23) અને મોહમ્મદ દાનિશ (34) ઘાયલ થયા હતા. ત્રણ પિસ્તોલ અને 11 જીવતા કારતૂસ મળી આવ્યા હતા. દિલ્હી પોલીસના જણાવ્યા અનુસાર, જાફરાબાદમાં ડબલ મર્ડર કેસમાં બંને આરોપીઓ ફરાર હતા.