ગોંડલ સિટીમાં એક કિશોરીનો અભ્યાસ એટલા માટે અટકી ગયો હતો કે, પરિવાર પાસે સ્કૂલની બાકી ફી ભરવાના પૈસા નહોતા. આઈ. સી. ડી.એસ.ના સ્ટાફના ધ્યાનમાં આ બાબત આવતાં, તેમણે એક સપ્તાહ સુધી જહેમત ઉઠાવીને બાકીના ફીનાં નાણાંની વ્યવસ્થા કરી આપી અને કિશોરીનો અભ્યાસ પુન: શરૂૂ કરાવ્યો છે. જેના લીધે આજથી આ કિશોરી ફરી હોંશે હોંશે સ્કૂલે જતી થઈ છે. આઈ. સી.ડી.એસ. (સંકલિત બાળવિકાસ યોજના) ગોંડલ ઘટક-1ના બાળવિકાસ પ્રોજેક્ટ અધિકારી (સી.ડી.પી.ઓ.) સોનલબહેન વાળા તથા ટીમ ગોંડલ સિટીમાં પૂર્ણા યોજના અન્વયે ઘરોના સર્વે માટે ગયા હતા.
દરમિયાન એક ઘરની મુલાકાત વખતે તેમણે એક કિશોરીને અભ્યાસ વિશે પૂછ્યું. આ સમયે કિશોરીએ ગમગીન સ્વરે કહ્યું હતું કે, નપોતે અભ્યાસ માટે નથી જતીથ. આથી સોનલબહેન તથા તેમની ટીમને આંચકો લાગ્યો.
એક દીકરીનો અભ્યાસ માત્ર ફીના વાંકે અટકે એ સાંભળીને સી.ડી. પી. ઓ. તથા તેમની ટીમ પણ ચિંતામાં પડી ગયા. આખરે આઈ. સી. ડી.એસ.ની આ ટીમે પૂછ્યું કે, નજો આ દીકરીની ફી અમે ભરી આપીએ તો આગળનો અભ્યાસ કરાવશો?થ આ સાંભળીને પિતા તથા કિશોરી બંને અભ્યાસ માટે રાજી થઈ ગયા.
એ પછી આઈ.સી.ડી.એસ.ની આ ટીમે ગોંડલ તાલુકા પ્રાથમિક શિક્ષણાધિકારી (ટી.પી.ઈ.ઓ.) સતિશભાઈ તેરૈયાનો સંપર્ક કર્યો અને હકીકત જણાવી. એ પછી ટી. પી. ઈ. ઓ. દ્વારા ખાનગી શાળાનો સંપર્ક કરવામાં આવ્યો અને સમગ્ર હકીકત ખાનગી શાળાને જણાવી અને 50 ટકા ફી માફ કરાવવામાં આવી. જો કે એ પછી પણ 50 ટકા જેટલી ફી ભરવાની હતી. આથી સી. ડી. પી. ઓ. સોનલબહેન તથા ટીમ દ્વારા મળીને દાતાના સહયોગથી આ ફી ભરી દેવામાં આવી. આ આખી કવાયતમાં ગોંડલ તાલુકા શાળા નંબર -4ના આચાર્ય અરવિંદભાઈ વોરાનો પૂરો સહયોગ મળ્યો.
બાળકીનો અભ્યાસ પુન: શરૂૂ થાય તે માટે ગોંડલ આંગણવાડી કોડ-7નાં કાર્યકર સપનાબેન ધરદેવે પણ ખાસ્સી મહેનત કરી. આ સમગ્ર કામગીરીમાં સી.ડી.પી.ઓ. સોનલબેન વાળા સાથે આંકડા મદદનીશ દિનેશભાઈ પાઘડાર તથા મુખ્ય સેવિકા પિન્ટુબેન દવેએ પણ ભારે જહેમત ઊઠાવી હતી.