રણજિત સાગર કેનાલમાં કેમિકલ પ્રદૂષણ: GPCB ઘોર નિદ્રામાં

પ્રદૂષણથી ખદબદતી કેનાલો સફાઈના નામે મીંડું :નાગરિકોમાં રોષની જ્વાળા

જામનગર શહેરના રણજિત સાગર રોડ પર આવેલી શાલીગ્રામ હોસ્પિટલ સામે ખેતલાઆપા ટી સ્ટોલ પાસેની કેનાલમાં કેમિકલ યુક્ત પ્રદૂષિત પાણી છોડવાનો ગંભીર આક્ષેપ કોંગ્રેસ કાર્યકર પાર્થ પટેલે કર્યો છે. તેમના દાવા મુજબ, મહાનગરપાલિકાની બેદરકારીના કારણે આ કેનાલ કેમિકલના ફીણથી છલકાઈ રહી છે અને તેનું પાણી પ્રદૂષિત થઈ રહ્યું છે.

પાર્થ પટેલે આક્ષેપ કર્યો છે કે, સફાઈના નામે ભાજપનું તંત્ર ભ્રષ્ટાચાર કરી રહ્યું છે. કેનાલો અને નદીઓને ઝેર બનાવવામાં આવી રહી છે. તેમણે તંત્રને તાત્કાલિક પગલાં લઈને કેનાલની સફાઈ કરવા અને કેમિકલ યુક્ત પાણી છોડવાનું બંધ કરવાની માંગ કરી છે.

આ કેનાલ અસંખ્ય કચરાથી ઉભરાઈ રહી છે, છતાં જામનગર મહાનગરપાલિકા જે શહેરને સ્માર્ટ બનાવવાના દાવા કરે છે તે માત્ર નાટક કરી રહી છે. નેતાઓ મૌન છે અને પ્રજા રોગચાળાના ભરડામાં છે.

આ સમગ્ર મામલે જામનગર મહાનગરપાલિકાએ હજુ સુધી કોઈ નિવેદન આપ્યું નથી. જોકે, આ મુદ્દે લોકોમાં રોષ વ્યાપી ગયો છે અને તંત્ર સામે કાર્યવાહીની માંગ ઉઠી છે.

આ કેનાલ પ્રદૂષણના ગંભીર પરિણામો આવી શકે છે જેમ કે પ્રદૂષિત પાણી પીવાથી થતા રોગચાળા, પર્યાવરણને નુકસાન, જીવજંતુઓ અને પક્ષીઓ પર અસર અને શહેરની છબીને ઠેસ. આવી સ્થિતિમાં શહેરના નાગરિકો અને સંબંધિત તંત્રે આ મુદ્દે ગંભીરતાથી વિચાર કરીને યોગ્ય પગલાં લેવા જરૂૂરી છે.

ગુજરાત પ્રદૂષણ નિયંત્રણ બોર્ડની કામગીરી સામે ગંભીર આક્ષેપો ઉઠી રહ્યા છે. લોકો દાવો કરી રહ્યા છે કે, બોર્ડ માત્ર ફરિયાદ મળ્યા બાદ જ કાર્યવાહી કરે છે અને અન્ય સમયે નિષ્ક્રિય રહે છે. આ અંગે લોકોમાં ભારે રોષ જોવા મળી રહ્યો છે અને પ્રદૂષણ બોર્ડની કામગીરી પર સવાલો ઉઠી રહ્યા છે.
લોકોનું કહેવું છે કે, રાજ્યમાં પ્રદૂષણનું સ્તર દિન પ્રતિદિન વધી રહ્યું છે. હવા અને પાણી બંને પ્રદૂષિત થઈ રહ્યા છે, પરંતુ પ્રદૂષણ નિયંત્રણ બોર્ડ આ સમસ્યાને ગંભીરતાથી લઈ રહ્યું નથી. બોર્ડ માત્ર ત્યારે જ જાગે છે જ્યારે કોઈ ફરિયાદ કરે છે અથવા મીડિયામાં આ મામલો પ્રકાશમાં આવે છે.

આ સંદર્ભમાં એવો પણ આક્ષેપ કરવામાં આવી રહ્યો છે કે, પ્રદૂષણ નિયંત્રણ બોર્ડના કેટલાક અધિકારીઓ પ્રદૂષકો સાથે મળીને કામ કરી રહ્યા છે. તેઓ પ્રદૂષકોને કોઈ પણ પ્રકારની કાર્યવાહી કર્યા વિના છોડી દે છે. આના કારણે પ્રદૂષકો બેફામ રીતે પ્રદૂષણ ફેલાવી રહ્યા છે.

લોકોનું માનવું છે કે, પર્યાવરણ મંત્રી પણ આ મામલે ગંભીર નથી. તેઓ પ્રદૂષણ નિયંત્રણ બોર્ડને કામ કરવા માટે પ્રેરિત કરી રહ્યા નથી. પરિણામે, રાજ્યનું પર્યાવરણ બગડી રહ્યું છે.

જો આ પરિસ્થિતિ યથાવત રહી તો આવનારા સમયમાં રાજ્યમાં પ્રદૂષણની સમસ્યા વધુ ગંભીર બની શકે છે. આનાથી લોકોના સ્વાસ્થ્ય પર ખરાબ અસર પડશે.