હિમાચલ પ્રદેશ અને કાશ્મીર ખીણમાં લઘુત્તમ તાપમાનમાં થોડો વધારો થવાથી તીવ્ર ઠંડીના મોજામાંથી થોડી રાહત મળી છે, પરંતુ મેદાની વિસ્તારોમાં તીવ્ર ઠંડી અને શીત લહેર ચાલુ છે. પંજાબ, હરિયાણા અને ઓડિશા સહિત રાષ્ટ્રીય રાજધાનીમાં તાપમાનમાં ઘટાડો નોંધાયો છે. ઓડિશાના મયુરભંજ જિલ્લાના રામતીર્થમાં લઘુત્તમ તાપમાન માઈનસ 10 ડિગ્રી નોંધાયું છે. તો દિલ્હીમાં 4.5 ડિગ્રી તાપમાન નોંધાયું છે. હવામાન વિભાગે એલર્ટ જારી કર્યું છે કે ઉત્તર-પશ્ચિમ ભારતમાં આગામી પાંચ દિવસ અને મધ્ય ભારતમાં આગામી ત્રણ દિવસ ઠંડીનું મોજુ યથાવત રહેશે.
હવામાન વિભાગના જણાવ્યા અનુસાર રવિવારે સવારે 8:30 વાગ્યા પહેલાના 24 કલાક દરમિયાન પંજાબ, હરિયાણા, ચંદીગઢ, પૂર્વ રાજસ્થાન અને મધ્ય પ્રદેશના ઘણા ભાગોમાં તીવ્ર ઠંડીનું મોજું પ્રવર્તી રહ્યું હતું. પશ્ચિમ રાજસ્થાન, પશ્ચિમ બંગાળના ગંગાના વિસ્તારો, ઉત્તર પ્રદેશ, વિદર્ભ, છત્તીસગઢ, બિહાર, ઝારખંડ અને ઓડિશાના અલગ-અલગ વિસ્તારો પણ સામાન્ય શીત લહેરની પકડમાં હતા.
તેનાથી વિપરીત, જમ્મુ-કાશ્મીર અને હિમાચલ પ્રદેશમાં લઘુત્તમ તાપમાનમાં થોડો વધારો નોંધાયો હતો અને તેના કારણે લોકોને તીવ્ર ઠંડીથી થોડી રાહત મળી હતી. શનિવારે રાત્રે શ્રીનગરમાં લઘુત્તમ તાપમાન માઈનસ 3.4 ડિગ્રી હતું, જે આગલી રાતના માઈનસ 4.6 ડિગ્રી કરતાં થોડું સારું છે. પ્રવાસીઓના પ્રિય સ્થળ ગુલમર્ગમાં તાપમાનનો પારો માઈનસ 3.8 ડિગ્રી નોંધાયો હતો, જે આગલી રાત કરતાં ચાર ડિગ્રી વધુ છે. અમરનાથ યાત્રાના બેઝ કેમ્પ સાઈટ પહેલગામમાં પણ લઘુત્તમ તાપમાન માઈનસ 4.8 ડિગ્રી નોંધાયું હતું, જે આગલી રાત કરતાં ત્રણ ડિગ્રી વધારે હતું.
હવામાન વિભાગે મધ્યપ્રદેશના કેટલાક વિસ્તારોમાં 16 ડિસેમ્બર અને પૂર્વ રાજસ્થાનના કેટલાક વિસ્તારોમાં 17 થી 20 ડિસેમ્બર સુધી કોલ્ડવેવની ચેતવણી જારી કરી છે. 19 ડિસેમ્બર સુધી જમ્મુ અને કાશ્મીર, લદ્દાખ, હિમાચલ પ્રદેશ, પંજાબ, હરિયાણા, ચંદીગઢ, દિલ્હી અને પશ્ચિમ રાજસ્થાનના કેટલાક વિસ્તારોમાં કોલ્ડવેવની સંભાવના છે. 16 થી 21 ડિસેમ્બર દરમિયાન ઉત્તર પ્રદેશ, ઉત્તરાખંડ, પૂર્વ રાજસ્થાન, ઓડિશા, મધ્ય મહારાષ્ટ્ર, સૌરાષ્ટ્ર અને ગુજરાતના કચ્છ અને તેલંગાણાના અલગ-અલગ ભાગોમાં પણ ઠંડા પવનો ફૂંકાવાની અપેક્ષા છે.
ઉત્તર ભારતમાં ઠંડી છે, તો દક્ષિણ ભારતમાં તમિલનાડુમાં વરસાદ પડી રહ્યો છે. રાજ્યમાં મુશળધાર વરસાદને કારણે થૂથુકુડીમાં ઘણી જગ્યાએ પાણી ભરાઈ ગયા છે. હવામાન વિભાગે તમિલનાડુ ઉપરાંત કેરળ અને લક્ષદ્વીપના ઘણા વિસ્તારોમાં વરસાદની ચેતવણી જારી કરી છે. વિભાગનું કહેવું છે કે આગામી 24 કલાક દરમિયાન બંગાળની ખાડીમાં દબાણ ક્ષેત્ર ક્યારે સર્જાય તેવી શક્યતા છે. તેની અસરને કારણે તમિલનાડુ અને અન્ય નજીકના રાજ્યોમાં આગામી બે દિવસમાં ભારેથી અતિ ભારે વરસાદ પડી શકે છે.