12 F-15E જેટ, 45 આધુનિક ડ્રોન, F-35સ્ટેલ્થ ફાઈટર સહિત 31927 કરોડનું નુકશાન
કોંગ્રેશનલ રિસર્ચ સર્વિસના એક નવા અહેવાલ મુજબ, આ વર્ષની શરૂૂઆતમાં ઈરાનમાં યુદ્ધ શરૂૂ થયા ત્યારથી અમેરિકાએ ઓછામાં ઓછા 81 લશ્કરી વિમાનો અને ડ્રોન ગુમાવ્યા છે અથવા તેને નુકસાન થયું છે; આ નુકસાનનું કુલ મૂલ્ય લગભગ 3.3 અબજ ડોલર છે. નુકસાન અંગેના આ દુર્લભ સત્તાવાર અહેવાલ મુજબ, ગુમાવવામાં આવેલા વિમાનોમાં અમેરિકાના કેટલાક અત્યાધુનિક યુદ્ધવિમાનોનો સમાવેશ થાય છે, જેમ કે F-35A લાઈટનિંગ II સ્ટેલ્થ ફાઈટર, F-15 જેટ અને MQ-9 રીપર ડ્રોન.
દરેક F-15 જેટની કિંમત 30 મિલિયન ડોલરથી વધુ છે, જ્યારે 45 MQ-9 રીપર ડ્રોનમાંથી દરેકની કિંમત 30 થી 50 મિલિયન ડોલરની વચ્ચે હોવાનો અંદાજ છે. અમેરિકાના સૌથી અત્યાધુનિક યુદ્ધવિમાનોમાંના એક એવા પાંચમી પેઢીના F-35A વિમાનની કિંમત 92 મિલિયન ડોલરથી વધુ છે.
“ઓપરેશન એપિક ફ્યુરીમાં અમેરિકન વિમાનોને થયેલું યુદ્ધ-જન્ય નુકસાન: કોંગ્રેસ માટે વિચારણાના મુદ્દા US Aircraft Combat Damage in Operation Epic Fury: Considerations for Congress) શીર્ષકવાળા અહેવાલ મુજબ, મધ્ય પૂર્વમાં મિશન દરમિયાન અમેરિકન દળોએ 12 F-15E વિમાનો, એક F-35A લાઈટનિંગ II ફાઈટર વિમાન, બે A-10 થંડરબોલ્ટ II ગ્રાઉન્ડ-એટેક વિમાનો અને સાત KC-135 સ્ટ્રેટોટેન્કર (હવામાં ઈંધણ ભરનારા વિમાનો) ગુમાવ્યા હતા.
અહેવાલમાં દર્શાવ્યા મુજબ, 2 માર્ચના રોજ કુવૈત ઉપર ’ફ્રેન્ડલી ફાયર’ (પોતાના જ પક્ષના દળો દ્વારા થયેલો ગોળીબાર)માં ત્રણ F-15 જેટ તોડી પાડવામાં આવ્યા હતા, જ્યારે તેના પછીના મહિને ઈરાન ઉપર અન્ય એક જેટ તોડી પાડવામાં આવ્યું હતું. તેમાં વધુમાં જણાવાયું છે કે 9 અને 10 સપ્ટેમ્બરના રોજ જોર્ડનમાં આવેલા મુવાફક સાલ્ટી એર બેઝ પર ઈરાનના હવાઈ હુમલા દરમિયાન અન્ય ઓછામાં ઓછા આઠ F-15E વિમાનોને પણ સામાન્ય નુકસાન થયું હતું.
ઈરાન સામે યુએસ સૈન્ય દ્વારા ઉપયોગમાં લેવાયેલા શસ્ત્રોનો ખર્ચ પણ માત્ર એક મહિનામાં 6 અબજ ડોલરથી વધુ વધ્યો છે; કોંગ્રેશનલ બજેટ ઓફિસના તાજેતરના અહેવાલમાં દર્શાવેલ 21.7 અબજ ડોલરથી વધીને યુએસ સેન્ટ્રલ કમાન્ડના અંદાજ મુજબ તે 28.1 અબજ ડોલર સુધી પહોંચ્યો છે.
