નોર્વેના પીએમનો દાવો, યુક્રેન તરફથી પુષ્ટિ નહીં
તાજેતરમાં યુક્રેનિયન રાષ્ટ્રપતિ વોલોડીમીર ઝેલેન્સ્કીની સુરક્ષાને લઈને એક અત્યંત ચોંકાવનારી અને ગંભીર ઘટના સામે આવી છે. મોલ્ડોવાથી નોર્વેની સફર દરમિયાન રાષ્ટ્રપતિ ઝેલેન્સ્કીનું વિમાન એક અજાણ્યા ડ્રોન સાથે અથડાતા માંડ-માંડ બચી ગયું હતું.
આ ગંભીર સુરક્ષા ચૂક અને જોખમની પુષ્ટિ નોર્વેના વડા પ્રધાન જોનાસ ગાર સ્ટોરે દ્વારા કરવામાં આવી છે. તેમણે બુધવારે રાજ્ય પ્રસારણકર્તા NRK સાથેની એક મુલાકાતમાં આ વાત સ્વીકારી હતી કે ઝેલેન્સ્કી જ્યારે મોલ્ડોવાથી ઉડાન ભરી રહ્યા હતા, ત્યારે તેમનું વિમાન ડ્રોન જોખમનો ભોગ બનતા રહી ગયું હતું. જોકે, આ આખી ઘટના અંગે યુક્રેનિયન અધિકારીઓ તરફથી હજુ સુધી કોઈ સત્તાવાર નિવેદન કે પુષ્ટિ કરવામાં આવી નથી.
નોર્વેના વડા પ્રધાન કાર્યાલયના રાજ્ય સચિવ ભાનુજા રસિયાએ પણ સ્પષ્ટ કર્યું કે મોલ્ડોવાના હવાઈ ક્ષેત્રમાં અચાનક ડ્રોનનો ખતરો ઉભો થવાથી ઝેલેન્સ્કીની ઓસ્લો જતી ફ્લાઇટ સમયસર રવાના થઈ શકી નહોતી અને તેમાં વિલંબ થયો હતો. આમ છતાં, તમામ જોખમો અને મુશ્કેલીઓને પાર કરીને ઝેલેન્સ્કી મંગળવારે સાંજે સુરક્ષિત રીતે ઓસ્લો પહોંચી ગયા હતા.
નોર્વેના નાણામંત્રી જેન્સ સ્ટોલ્ટનબર્ગે પણ આ ઘટનાની પુષ્ટિ કરતાં જણાવ્યું કે ઓસ્લો પહોંચ્યા બાદ તરત જ ખુદ ઝેલેન્સ્કીએ તેમને આ ભયાનક અનુભવ વિશે વિસ્તારથી જણાવ્યું હતું.
