ઉત્તર પ્રદેશના ગાઝિયાબાદમાંથી કરુણ ઘટના સામે આવી છે. અહી ત્રણ સગીર સગી બહેનોએ નવમા માળેથી કૂદીને આત્મહત્યા કરી લીધી છે. પ્રાથમિક તપાસમાં આ ભયાનક પગલા પાછળ ઓનલાઇન કોરિયન લવ ગેમની લત હોવાનું બહાર આવ્યું છે. આ કેસમાં હવે એક નવો અને ચોંકાવનારો ખુલાસો થયો છે. પોલીસે ઘટનાસ્થળેથી એક સુસાઇડ નોટ અને ડાયરી મળી આવી હોવાના અહેવાલ છે. નોટમાં, ત્રણેય બહેનોએ લખ્યું હતું, “હું તમને પ્રેમ કરું છું, મમ્મી-પપ્પા. માફ કરશો.” ડાયરીમાં એવું પણ લખ્યું હતું કે, “we love korian game.”
પોલીસે બંને વસ્તુઓ તેમજ ત્રણ મોબાઇલ ફોન ફોરેન્સિક તપાસ માટે મોકલ્યા છે. અહેવાલો અનુસાર, મોબાઇલ ફોન હજુ સુધી અનલોક થયા નથી. અનલોક થયા પછી જ વિગતો જાહેર થશે. મૃતક છોકરીઓના પિતા ચેતન છે, જે એક ઓનલાઈન વેપારી છે. તેના બે વાર લગ્ન થયા છે અને તે છેલ્લા ત્રણથી ચાર વર્ષથી ભારત સિટી સોસાયટીમાં તેની બે પત્નીઓ સાથે રહેતો હતો.
એવું કહેવામાં આવી રહ્યું છે કે તે બધા ઓનલાઈન ટાસ્ક-આધારિત ગેમ “કોરિયન લવર” રમતા હતા. ત્રણેય બહેનોની આત્મહત્યાથી વિસ્તારમાં ગભરાટનું વાતાવરણ સર્જાયું છે. આત્મહત્યા કરનાર બહેનોની ઓળખ નિશિકા (૧૬), પ્રાચી (૧૪) અને પાખી (૧૨) તરીકે થઈ રહી છે.
પિતાએ ત્રણેય વિશે શું કહ્યું?
પિતા ચેતન કુમારે કહ્યું, “કોવિડ-૧૯ મહામારી દરમિયાન ત્રણેય દીકરીઓ મોબાઈલ ગેમ્સની વ્યસની હતી. ત્રણેય ટાર્ગેટ ગેમ્સ રમતી હતી. પરંતુ અમને ખબર નથી કે તેમણે આવું કેમ કર્યું.” પોલીસના જણાવ્યા અનુસાર, તેમનું સ્કૂલિંગ નિયમિત નહોતું.
પોલીસે કેસ વિશે શું કહ્યું?
પોલીસે કહ્યું, “આખી ઘટના ભારત સિટી બી-૧ ટાવરના ફ્લેટ નંબર ૯૦૭માં રાત્રે ૨ વાગ્યાની આસપાસ બની હતી. સ્થાનિક લોકોએ જણાવ્યું હતું કે મોડી રાત્રે જોરદાર અવાજ સાંભળીને તેઓ બધા બહાર આવ્યા હતા, ત્યારબાદ અમને જાણ કરવામાં આવી હતી. પોલીસ કહે છે કે તમામ પાસાઓની તપાસ કરવામાં આવી રહી છે. ડિજિટલ પ્રવૃત્તિઓ, નજીકના સીસીટીવી ફૂટેજ અને મોબાઈલ ફોન ડેટાની ફોરેન્સિક તપાસ કરવામાં આવશે.