ગુજરાતી સંગીતના જાણીતા સંગીતકાર ગૌરાંગ વ્યાસનું 87 વર્ષની વયે નિધન થયું છે. ગૌરાંગ વ્યાસે મોડી રાત્રે અમદાવાદમાં અંતિમ શ્વાસ લીધા હતા. તેમના નિધનથી ગુજરાતી ફિલ્મ અને સંગીત જગતમાં શોકની લાગણી પ્રસરી છે. ગૌરાંગ વ્યાસનું ગુજરાતી સંગીત ક્ષેત્રે અવિસ્મરણીય યોગદાન રહ્યું છે. તેમણે 100થી વધુ ગુજરાતી ફિલ્મોમાં સંગીત આપ્યું હતું, જ્યારે 500થી વધુ ગુજરાતી ગીતકારો, કવિઓ અને ગઝલકારોની રચનાઓને સંગીતબદ્ધ કરી હતી.
ગૌરાંગ વ્યાસને સંગીતની કળા વારસામાં મળી હતી. તેમના પિતા ગુજરાતી સંગીતના દિગ્ગજ અવિનાશ વ્યાસ હતા. પિતાના સંગીત વારસાને આગળ ધપાવતા ગૌરાંગ વ્યાસે લોકસંગીત, ભજન, રાસ-ગરબા સહિત સંગીતના અનેક ક્ષેત્રોમાં પોતાની આગવી ઓળખ બનાવી હતી.
તેમના અનેક સંગીત આલ્બમ પણ ખૂબ લોકપ્રિય રહ્યા હતા. જેમાં ‘ભજન અનમોલ’, ‘જલારામની ઝૂંપડી’, ‘ગંગા સતીના ભજનો’, ‘કહત કબીર’, ‘નોન સ્ટોપ ડાંડિયા રાસ’ અને પ્રાચીન પ્રભાતિયાં જેવા આલ્બમનો સમાવેશ થાય છે.જાણીતી ગુજરાતી ફિલ્મ **‘લવની ભવાઈ’**માં તેમનું સંગીત પણ યાદગાર રહ્યું હતું. જ્યારે ‘આજ વગડાવો રુડા શરણાઈ…’ અને ‘મને એકલી મેલીને’ જેવી તેમની સંગીતબદ્ધ રચનાઓ આજે પણ શ્રોતાઓમાં લોકપ્રિય છે.
ગૌરાંગ વ્યાસનો જન્મ 24 નવેમ્બર 1938ના રોજ થયો હતો. ગુજરાતી ફિલ્મ અને સંગીત જગતમાં તેમના અમૂલ્ય યોગદાન બદલ તેમને GIFA તરફથી ગોલ્ડન એવોર્ડથી પણ સન્માનિત કરવામાં આવ્યા હતા.87 વર્ષની વયે ગૌરાંગ વ્યાસે દુનિયાને અલવિદા કહી છે, પરંતુ ગુજરાતી સંગીતને આપેલી તેમની અમૂલ્ય ભેટ અને તેમની સંગીતમય રચનાઓ હંમેશા યાદગાર રહેશે.