હોર્મુઝ સ્ટ્રેટ નજીક અમેરિકી આર્મીનું એક હેલિકોપ્ટર ક્રેશ થયાની ઘટના બની છે. તેમાં સવાર બંને પાઇલટનો સુરક્ષિત બચાવ થયો છે. હાલમાં તે સ્પષ્ટ નથી કે હેલિકોપ્ટર ઈરાની હુમલાનો ભોગ બન્યું કે ટેકનિકલ ખામી સર્જાઈ કે કોઈ અન્ય કારણોસર ક્રેશ થયું. અહેવાલ મુજબ આ ઘટનાની બે અધિકારીઓએ પુષ્ટિ કરી છે. જોકે, ટ્રમ્પ વહીવટીતંત્રે હજુ સુધી આ બાબતે કોઈ સત્તાવાર નિવેદન કે અપડેટ જારી કર્યું નથી.
યુએસ સેન્ટ્રલ કમાન્ડે પણ આ ઘટના પર કોઈ ટિપ્પણી કરી નથી. આ દુર્ઘટના એવા સમયે થઈ છે જ્યારે આ પ્રદેશમાં તણાવ વધી રહ્યો છે. છેલ્લા કેટલાક દિવસોમાં ઇઝરાયલ અને ઈરાન વચ્ચે હુમલાઓ થયા છે.
જો કે આ સંઘર્ષ દરમિયાન હેલિકોપ્ટર તૂટી પડવાની આ પહેલી ઘટના છે. યુએસ સેના આ પ્રદેશમાં વિવિધ પ્રકારના શસ્ત્રો અને વિમાનો તૈનાત કરી રહી છે, જેમાં અપાચે હેલિકોપ્ટર, MQ-9 રીપર ડ્રોન અને F/A-18 અને F-35 ફાઇટર જેટનો સમાવેશ થાય છે. આ સંપત્તિઓનો ઉપયોગ ઈરાની પ્રવૃત્તિઓનો સામનો કરવા અને હોર્મુઝ સ્ટ્રેટમાં તેના પ્રભાવને રોકવા માટે થઈ રહ્યો છે. અહેવાલો દર્શાવે છે કે ઈરાને અત્યાર સુધીમાં લગભગ 30 રીપર ડ્રોનને તોડી પાડ્યા છે.
AH-64 અપાચ હેલિકોપ્ટરને વિશ્વના સૌથી ભયંકર અને શક્તિશાળી હેલિકોપ્ટર માનવામાં આવે છે. તે હેલફાયર મિસાઇલોથી સજ્જ છે અને તેનો ઉપયોગ ડ્રોનને તોડી પાડવા અને નાની બોટો દ્વારા થતા હુમલાઓ સામે રક્ષણ કરવા માટે થાય છે. તાજેતરના મહિનાઓમાં આ હેલિકોપ્ટર ઈરાન નજીકના વિસ્તારોમાં અને ગલ્ફ ક્ષેત્રમાં વધુને વધુ સક્રિય બન્યા છે.
